TOShKENT, 22 apr - Sputnik. Forish tumani “Egizbuloq” mahallasida kuchli sel oqibatlarini bartaraf etish ishlari olib borilmoqda, deb xabar qilmoqda Jizzax viloyati hokimligi.
Favqulodda vaziyatlar vazirligi, Milliy gvardiya, tuman korxonalari vakillari vhamda ko‘ngilli yoshlar faol ishtirok etib, aholi xonadonlari, tomorqalari, mahallaning ichki yo‘llari oqiziqlar, qum-shag‘aldan tozalanyapti.
Shuningdek, Forish tuman Obodonlashtirish boshqarmasining 129 nafar ishchilari sel oqibatlarini bartaraf etishda faol ishtirok etmoqda.
“Egizbuloq” mahallasiga viloyatdagi barcha tumanlardan va tashkilot, muassasalari mahallalardan jamlangan gumanitar yordam kelishi davom etmoqda.
Oziq-ovqat va qishloq xo‘jalik mahsulotlari, kiyim-kechak, ko‘rpa-to‘shak, qurilish materiallaridan iborat gumanitar yordam mahalladagi 15-umumta’lim maktabiga to‘planib, seldan talofat ko‘rgan mahalla aholisiga yetkazib berilayapti.
Eslatib o‘tamiz, 20-aprel kuni Jizzax viloyatining Baxmal, Forish, G‘allaorol va Sh.Rashidov tumanlarida sel kelgan edi. tabiiy ofat oqibatida aholi yashash joylari, ijtimoiy soha obyektlari, ekin maydonlari barbod bo‘lgan, 5 kishi qurbon bo‘lgan edi.