TOShKENT, 1-iyul — Sputnik. Qozog‘istonda butun mamlakat bo‘ylab qator soha xodimlarini koronavirusga qarshi emlash majburiy etib belgilandi. Mamlakat bosh sanitar vrachi tegishli qarorga imzo chekdi.
2 iyuldan aholiga xizmat ko‘rsatish, savdo-sotiq, tibbiyot, ta’lim sohasidagi xodimlar koronavirusga qarshi emlanishlari shart.
Emlanmagan xodimlar haftada bir marta kovidga PZR test topshiradi. Qozog‘iston sog‘liqni saqlash vaziri Aleksey Soy test uchun pulni xodimlarning o‘zi yoki ularning ish beruvchilari to‘lashlariga to‘g‘ri kelishini aytgan.
Bu qaror koronavirusga qarshi emlanishda tibbiyot nuqtayi nazaridan uzrli holatlari bo‘lgan kishilar hamda so‘nggi uch oy ichida bu kasallikni boshdan kechirganlarga taalluqli emas.
Vaksinaning birinchi komponentini 2021-yil 15-iyuligacha, ikkinchi komponentini esa 15-avgustigacha olish kerak.
Eslatib o‘tamiz, Rossiyaning qator mintaqalarida, jumladan, Moskvada aholining 60 foizini koronavirusga qarshi emlash majburiy etib belgilangan. Majburiy emlanish savdo-sotiq, xizmat ko‘rsatish, umumiy ovqatlanish, uy-joy kommunal, ta’lim, transport, sog‘liqni saqlash, ijtimoiy himoya hamda go‘zallik saloni, fitnes-klub, teatr, kinoteatr, konsert zallari va boshqa sohalarda ishlovchi xodimlarga taalluqli.