TOShKENT, 6-iyun — Sputnik. Maktabgacha ta’lim vaziriga yangi ikki o‘rinbosar tayinlandi. Bu haqda vazirlik matbuot xizmati xabar bermoqda.
Vazirning birinchi o‘rinbosari Qahramon Olimov boshqa ishga o‘tishi munosabati bilan lavozimidan ozod etildi. Uning o‘rniga Vazirlar Mahkamasida ishlab kelgan Bahodirjon Onorboyev tayinlandi.
Bahodir Onorboyev 2020-yilning iyulidan boshlab u Vazirlar Mahkamasining Ta’lim, sog‘liqni saqlash, madaniyat, yoshlar, ma’naviyat va jamoat tashkilotlari, mahalla va oilani qo‘llab-quvvatlash bo‘yicha kotibiyati rahbari lavozimida ishlab kelayotgan edi.
Shuningdek, vazir o‘rinbosari Maqsudjon Yo‘ldoshev boshqa ishga o‘tishi munosabati bilan lavozimidan ozod etildi.
Vazirning yangi o‘rinbosari lavozimiga oliy va o‘rta maxsus ta’lim vazirining o‘rinbosari bo‘lib ishlab kelgan Uzoqboy Begimqulov tayinlandi.
Uzoqboy Begimqulov 2017-yildan buyon oliy va o‘rta maxsus ta’lim vazirining fan va innovatsiyalar bo‘yicha o‘rinbosari bo‘lib ishlab kelayotgan edi.