TOShKENT, 25 apr — Sputnik. Dushanbe shahrida Tojikiston va O‘zbekiston Transport vazirliklari vakillarining muzokaralari bo‘lib o‘tdi.
Sputnik Tojikiston xabariga ko‘ra, unda Panjakent (Tojikiston) va Bulung‘ur/Jomboy (O‘zbekiston) uchastkasida yangi temir yo‘lini qurish masalasi ham muhokama qilingan.
Muzokaralarda Bekobod-Istiqlol temir yo‘lini elektrifikatsiya qilish masalalariga alohida e’tibor qaratilgan. Shuningdek, bu uchastkada tranzit yuk tashish hajmini ko‘paytirish imoniyati ko‘rib chiqilgan.
Yig‘ilishda tomonlar O‘zbekiston-Tojikiston-Xitoy transport yo‘lagini rivojlantirish va Hashtak-Bekobod nazorat o‘tkazish punktini qayta tiklash mavzulariga ham to‘xtatib o‘tgan.
Eslatib o‘tamiz, 21-aprel kuni Dushanbe shahriga O‘zbekistonning tegishli vazirlik va idoralari vakillaridan iborat delegatsiya tashrif buyurgan. Ular tojikistonlik hamkasblari bilan birga prezident Shavkat Mirziyoyevning Dushanbega tashrifi yakunida imzolanishi kutilayotgan loyihalar ustida ish olib borishadi.