TOShKENT, 12 yanv – Sputnik. O‘zbekistonda sud Nasafiy taxallusi ostida ijod qilayotgan havaskor xonanda Akmalov Aziziddinni jarimaga tortdi, deb xabar qilmoqda Intellektual mulk agentligi.
Xabarda aytilishiga ko‘ra, bir oy oldin Mualliflik va turdosh huquqlarni himoya qilish jamoat birlashmasi tomonidan O‘zbekiston xalq artisti Sherali Jo‘rayevning “Qora ko‘zli sanamjon” qo‘shig‘ini muallif roziligini olmasdan va yaxlitligini buzgan holda ijro etgani, uni internet tarmoqlariga joylashtirib moddiy manfaat ko‘rib kelayotgani uchun “Nasafiy” ustidan Intellektual mulk agentligiga murojaat kelib tushgan.
Shundan sung Agentlik mazkur holat yuzasidan Ma’muriy sudga bayonnoma kiritgan. Sud Nasafiyni Ma’muriy javobgarlik to‘g‘risidagi kodeksning 177–moddasining 1-qismida nazarda tutilgan ma’muriy huquqbuzarlikni sodir qilgan deb topib, bazaviy hisoblash miqdorining 3 baravari ya’ni 669 000 ming so‘m miqdorida jarima jazosi tayinlagan.
Bu O‘zbekiston estradasida mualliflik huquqi buzilishi bo‘yicha ko‘rib chiqilgan birinchi ish bo‘lsa ajab emas. Ushbu sohada ko‘rib chiqilgan boshqa ishlar va jarimalar haqida Internetda ma’lumot topilmadi.