TOShKENT, 6-may — Sputnik. Bugun, 6-may soat 17:00 holatiga ko‘ra, O‘zbekistonda koronavirus infeksiyasi qayd etilganlar soni 2231 nafarni tashkil qilmoqda.
SSV ma’lum qilishicha, shifoxonalarda davolanayotgan bemordan 10 nafarining ahvoli og‘ir, 1 nafarining ahvoli o‘ta og‘ir.
Tuzalish dinamikasi
O‘zbekiston bo‘ylab koronavirus infeksiyasidan sog‘aygan bemorlar 1577 nafarga yetdi.
Bugun hozircha Toshkent, Andijon, Namangan, Buxoro, Xorazm va Samarqand viloyatlarida jami 76 nafar bemor tuzaldi. Ular orasida 78 yoshli otaxon ham bor.
“Qizil” hudud
Namangan va Samarqand “qizil” — yuqori xavfli hududga kiritildi. Hozircha bu hududlarda karantin qoidalari yumshatilmaydi.
Namangan viloyatida 6-may kuniga qadar 230 nafar shaxs koronavirus infeksiyasiga chalingani aniqlangan va Namangan bu ko‘rsatkich bo‘yicha respublikada Toshkent shahri (668 nafar bemor), Buxoro viloyati (435) va Xorazm viloyatidan (232) keyingi to‘rtinchi o‘rinda turibdi.
Koronavirusdan o‘lim holati bo‘yicha esa (4 ta) Namangan Toshkentdan so‘ng (5 ta) ikkinchi o‘rinda qayd etilgan.
Samarqand viloyatida ham bemorlarning atigi 23 foizi tuzalgan, xolos.
COVID-19 dunyo bo‘ylab tarqalishi
BSSTning so‘nggi ma’lumotlariga ko‘ra, dunyoda 3,5 million ziyod kishi yangi koronavirusni yuqtirib oldi, 243 ming kishi bu infeksiyadan vafot etdi.