TOShKENT, 16 yanv — Sputnik. Jizzaxdagi gaz quyish shoxobchasida portlash oqibatida bir kishi qurbon bo‘ldi.
IIV huzuridagi Tergov departamenti xabariga ko‘ra, hodisa bugun, 16-yanvar kuni Zarbdor tumani Yangihayot mahallasidagi “Gaz manbai” MChJga qarashli avtomobillarga suyultirilgan gaz (propan) quyish shoxobchasida yuz bergan.
Qayd etilishicha, portlash ta’mirlash-payvandlash ishlari olib borilayotganida kelib chiqqan chaqnash oqibatida ro‘y bergan.
“Natijada mazkur MChJ ishchilaridan fuqaro 40 yoshli Sh.A. hodisa joyida vafot etgan, 44 yoshli E.I. esa turli tan jarohatlari bilan shifoxonaga yotqizilgan”, - deyilgan xabarda.
Hozirda hodisa joyida tergov-tezkor guruhi ishlamoqda, portlashning kelib chiqish sabablari o‘rganilmoqda.