TOShKENT, 13 dek – Sputnik. Kecha Toshkentdagi “International Hotel Tashkent” mexmonxonasida O‘zbekiston - Eron biznes forumi bo‘lib o‘tdi. Unda O‘zbekiston Sarmoyalar va tashqi savdo vaziri Sardor Umurzoqov Eron Sanoat, shaxtalar va savdo vaziri Reza Raxmani bilan uchrashdi.
Uchrashuv davomida Eron tomon O‘zbekiston bilan munosabatlarga aolhida e’tibor berayotganini, hamda ikki tomonlama savdo hamkorligini yanada yuqori darajaga ko‘tarishga tayyor ekanini xabar qildi. Shu jumladan Eron Fors ko‘rfazi davlatlari va O‘zbekiston orasida tovarlar hech qanday cheklovsiz harakatlanishi uchun yo‘l ochib berishga tayyorligini xabar qildi.
“Eron Shimoliy Afrika va Fors ko‘rfazidan mahsulotlarni hech qanday cheklovsiz O‘zbekistonga olib kelish uchun tranzit koridor yaratishga tayyor”, - dedi Eron vaziri.
Eslatib o‘tamiz, 2018 yil yakunlariga ko‘ra, O‘zbekiston va Eron o‘rtasidagi o‘zaro tovar aylanmasi 306,5 million dollarni tashkil etdi. Bugungi kunda O‘zbekistonda Eron sarmoyadorlari ishtirokida 120 ta qo‘shma korxona faoliyat ko‘rsatmoqda. Ulardan 15 tasi 100% Eron kapitali ishtirokida tashkil qilingan.