Xalq ta’limi vazirligi matbuot kotibi A.Umarov aytishiga qaraganda ushbu holat 2-dekabr kuni Shayxontohur tumanidagi umumiy o‘rta ta’lim maktablarining birida sodir bo‘lgan.
Maktabning 8-“B” sinf o‘quvchilari sinfda o‘zaro joy talashib, bir-birini haqoratlagan va tanaffus vaqtida maktab binosi 3-qavatidagi o‘tish yo‘lagida uch nafar o‘quvchi to‘rtinchi birini ayamay do‘pposlagan.
Ayni damda holat yuzasidan Shayxontohur tuman xalq ta’limi bo‘limi, Shayxontohur tuman IIO FMB inspektorlari maktab ma’muriyati o‘qituvchilar va ota-onalar o‘rtasida surishtiruv ishlarini olib bormoqda.
Shuningdek, bezorilik sodir etgan o‘quvchilarning ishini voyaga yetmaganlar komissiyasiga taqdim etish va O‘zbekiston Respublikasi Ma’muriy javobgarlik to‘g‘risidagi kodeksining 47-moddasi bo‘yicha jazolash masalasi ko‘rib chiqilmoqda.