TOShKENT, 23 noya - Sputnik. AQSh Davlat departamenti O‘zbekiston prezidenti Shavkat Mirziyoyevning davlat organlari va OAV hamkorligi borasida aytgan fikrlariga izoh berdi.
22 noyabr kuni o‘tkazilgan qishloqlar va shaharlarda aholini uy-joy bilan ta’minlashning yangi tizimini joriy etish bo‘yicha amalga oshiriladigan chora-tadbirlar muhokamasiga bag‘ishlangan videoselektor yig‘ilishida O‘zbekiston rahbari davlat organi rahbarlarining o‘zi boshqarib turgan idora obro‘si uchun mas’uliyati, shuningdek, rahbarlar xalq va OAV bilan muloqotda o‘zlarini kamtarin tutishlari lozimligi, har bir qarorni qabul qilishda qonunga tayanish kerakligini ta’kidlagan edi.
AQSh Davlat kotibining Janubiy va Markaziy Osiyo masalalari bo‘yicha yordamchisi vazifasini bajaruvchi Elis Uells o‘zining Tvitterdagi sahifasida: "Prezident Sh.Mirziyoyev O‘zbekistonda OAVga nisbatan bo‘layotgan tahdidlarni qoralayotgani va o‘zining OAV erkinligi bo‘yicha qarori qat’iy ekanligini yana bir karra ta’kidlaganini eshitib xursand bo‘ldim. Jurnalist va blogerlar xavfsizligi, ular o‘z ishlarini erkin amalga oshirishlarini ta’minlash demokratiya va ochiqlikning yanada keng taraqqiy etishiga imkon yaratadi", - degan fikrlarni yozib qoldirgan.