TOShKENT, 18-iyun – Sputnik. Qozog‘istonda ruxsat berilmagan mitinglarni oldini olish jarayonida 300 dan ortiq politsiyachi jarohatlandi. Ulardan 6 nafar shifoxonaga yotqizildi. Bu haqda Qozog‘iston ichki ishlar vaziri Yerlan Turgumbayev ma’lum qildi.
Nur-Sulton va Olma-Otada ommaviy norozilik aksiyalari o‘tkazildi. Saylov kunida ikkita yirik shaharda yuzlab kishilar qo‘lga olindi. Dushanba kuni ham politsiya ko‘plab namoyishchilarni ushladi.
Ommaviy namoyishlarga aholini internet orqali Fransiyada istiqomat qiluvchi“Qozog‘iston demokratik tanlovi” (ekstremistik deb tan olingan) harakati rahbari Muxtar Ablyazov chorladi. U o‘z tarafdorlarini prezident saylovlarini boykot qilishga chaqirdi.
“Uch yuzdan ortiq politsiya xodimlari tan jarohat oldi, hozirgi vaqtda ulardan 6 nafari shifoxonada. Bu 3 sutka – 9,10, 11-iyun... Politsiya hech qanday maxsus vositalarni qo‘llamadi”, - dedi vazir.
Bundan avval saylov davrida 9 va 10-iyun kunlari Nur-Sulton va Olma-ota shaharlarida o‘tkazilgan noqonuniy mitinglar davomida 700 ga yaqin kishi qo‘lga olingani haqida xabar bergandik.