TOShKENT, 21 mar - Sputnik. Forbes e’lon qilgan eng ko‘p daromadga ega bo‘lgan rossiyalik milliarderlar ro‘yxatida Alisher Usmonov 5-o‘rinni egalladi.
Milliarderlar reytingidan farqli ravishda, bunda faqat aktivlarni sotish yoki dividendlar shaklida olingan real pullar hisobga olinadi. Shaxsiy mulkni sotish bo‘yicha kelishuvlar hisobga olinmagan. Baholanayotgan daromad - bu yalpi daromad yoki gross daromad. Soliqlar stavkasida qarama-qarshiliklar yoki tushunarsizlikka yo‘l qo‘ymaslik uchun soliqlar, kreditlarga xizmat ko‘rsatish xarajatlari va turli komissiyalar hisobga olinmagan.
Forbes nashrining ma’lum qilishicha, Alisher Usmonov 2018-yilda 1,1 milliard dollar daromadga ega bo‘ldi. Ushbu summa “Metalloinvest”dan olingan dividendlar va Londonning “Arsenal” futbol klubidagi ulushning sotilishi natijasida hosil bo‘lgan.
Forbes reytingidagi birinchi o‘rinni 2,4 milliard dollar daromad bilan Sergey Galiskiy egalladi. U “Magnit” reteylerining 29 foiz aksiyalarini sotib yuborgan. Ikkinchi pog‘onadan "Oneksim" guruhi egasi va prezidenti Mixail Proxorov joy olgan. NLMK rahbari Vladimir Lisin reytingdagi 3-o‘rinni egallagan.