TOShKENT, 13 mar — Sputnik. Samarqand viloyati Toyloq tumanida hududlarni ijtimoiy-iqtisodiy rivojlantirish bo‘yicha beshinchi sektor — Milliy xavfsizlik xizmati viloyat boshqarmasi tashabbusi bilan profilaktik tadbir o‘tkazildi, deb xabar qilmoqda "Zarafshon" gazetasi.
Milliy xavfsizlik xizmati, ichki ishlar idoralari, mahalla fuqarolar yig‘inlari va tuman ovchilik jamiyati vakillari ishtirok etgan tadbirda o‘q otar qurollar, o‘q-dorilar va portlovchi moddalarning noqonuniy aylanishining oldini olishda jamoatchilikning o‘rni, uzoq muddatga xorijga ishlash uchun ketgan fuqarolarning diniy ekstremistik oqimlarga qo‘shilib qolishiga yo‘l qo‘ymaslik masalalari muhokama etilgan.
Shuningdek, yig‘ilishda o‘tgan asrning 70-yillariga qadar mavjud bo‘lgan o‘qotar qurollar rasman ro‘yxatdan o‘tkazilmaganligi, ayrim fuqarolar bu kabi qurollarni noqonuniy saqlayotganligi aytilgan.
Agarda fuqarolar bu o‘qotar qurollarni ixtiyoriy ravishda topshirsa, jinoiy javobgarlikka tortilmasligi haqida aholi o‘rtasida tushuntirish ishlari olib borish lozimligi ta’kidlangan.