TOShKENT, 23 fev — Sputnik. O‘zbekiston hukumati o‘zbek-tojik davlat chegarasida ayrim o‘tkazuv punktlari faoliyatini tiklash bo‘yicha qaror qabul qildi, deb xabar qilmoqda Sputnik O‘zbekiston muxbiri.
Adliya vazirligi ma’lumotlariga ko‘ra, yaqin vaqtlarda Samarqand viloyatidagi "Jartepa", Jizzax viloyatidagi — "Qushkent" va "Uchturg‘on", Sirdaryo viloyatidagi — "Xovostobod", Toshkent viloyatidagi — "Bekobod", Namangan viloyatidagi — "Pop", Farg‘ona viloyatidagi — "Ravot", Surxondaryo viloyatidagi — "Gulbahor" avtomobil o‘tkazish punktlaridagi infratuzilmalarni yaxshilash bo‘yicha ishlar yo‘lga qo‘yiladi.
Bundan tashqari, hukumat Amuzang temir yo‘l o‘tkazish punkti infratuzilmasini tartibga solishni rejalashtirmoqda.
"O‘zbekiston temir yo‘llari" kompaniyasiga 1-mart sanasiga qadar "G‘alaba — Xoshadiy" temir yo‘l uchastkasining O‘zbekistondagi qismini qayta ta’mirdan chiqarish hamda bu yerda o‘tkazuv punktini jihozlash topshirig‘i berilgan.
Yana bir muhim xabar — Samarqand viloyatida yangi o‘tkazish punkti paydo bo‘ladi. U Urgut tumanining Jartepa poselkasida joylashadi.