Lavrov Ukraina, muzokaralar va Rossiya aktivlari haqida — asosiy bayonotlar
16:16 15.09.2026 (yangilandi: 16:44 15.09.2026)
© Sputnik / Ramil Sitdikov
/ Obuna bo‘lish
Rossiya Ukraina bo‘yicha muzokaralarni tiklashga tayyor, biroq Moskva xavfsizlikka oid asosiy talablaridan voz kechmoqchi emas.
TOShKENT, 15 sen — Sputnik. Rossiya tashqi ishlar vaziri Sergey Lavrov Ukraina atrofidagi vaziyat bo‘yicha elchixona davra suhbatida muzokaralar, Ankorij kelishuvlari, muzlatilgan Rossiya aktivlari va xalqaro sudlar haqida fikr bildirdi.
Lavrovning asosiy bayonotlari:
Rossiya Ukraina bo‘yicha muzokaralardan hech qachon voz kechmagan va qarshi tomon tayyor bo‘lsa, ularni qayta tiklashga tayyor. Vazirning aytishicha, Moskvada muhokama qilish uchun masalalar bor.
Lavrovning fikricha, agar AQSh va Yevropa Ankoridjda muhokama qilingan yondashuvlardan uzoqlashmaganida, harbiy harakatlar bir yil avval to‘xtashi mumkin edi. U Rossiya Amerika tomoni ilgari surgan takliflarni qabul qilganini ta’kidladi.
Rossiya o‘z xavfsizligi, chegaralari yaqinida NATOning paydo bo‘lmasligi hamda rus va rusiyzabon aholi huquqlarini ta’minlashga oid talablarini saqlab qolmoqda. Shu bilan birga, Moskva ushbu doirada "oqilona murosalar" izlashga tayyor, dedi vazir.
G‘arbning Rossiyaga qarshi huquqiy harakatlarini Lavrov "anglo-sakslar ixtiro qilgan yuridik urush" deb atadi. Uning so‘zlariga ko‘ra, bunday yondashuvda asosiy maqsad ayblovlarning shov-shuvli bo‘lishi: "avval xo‘roz kabi qichqirish kerak, tong otish-otmasligi esa ularni unchalik qiziqtirmaydi".
Lavrov G‘arbda Ukraina hukumati nazoratida qoladigan hududlarga xorijiy kuchlarni joylashtirish ssenariylari ishlab chiqilayotganini aytdi. Moskva bunday variantga qarshi ekanini bildirmoqda.
Vazir YeIda muzlatilgan Rossiya aktivlarini Ukraina manfaatlari uchun ishlatishga qaratilgan sxemalar ishlab chiqilayotganini ta’kidladi. Uning so‘zlariga ko‘ra, Belgiya bunday qadam tashlashni rad etmoqda, shu sabab mas’uliyatni butun Yevropa Ittifoqi o‘rtasida taqsimlashga urinishlar bo‘lmoqda.
"Biz oltin-valyuta zaxiralarimizni qaytarishga erishamiz. Bunga zarracha shubham yo‘q", — dedi Lavrov.
Lavrov Xalqaro jinoiy sudni "kvazi-sud organi" deb atadi va uning "odil sudlov bilan aloqasi kam", G‘arb homiylari nazorati ostida ekanini aytdi. Uning fikricha, bunday global jinoiy instansiyaga muqobil tuzilma yaratish ham shart emas, chunki xalqaro jinoiy sudlar mojarolarni hal qilishga deyarli yordam bermaydi.
Rossiya BMT Xalqaro sudidan Donbassda genotsid masalasi bo‘yicha o‘z qarshi da’vosi yuzasidan qaror kutmoqda. Lavrovning so‘zlariga ko‘ra, hozir sudda ko‘rib chiqilishi lozim bo‘lgan masala — Ukrainaning o‘zi Donbassda genotsid sodir etgan-etmagani. U Rossiya tegishli dalillarni sudga taqdim etganini bildirdi.
Lavrovning so‘zlariga ko‘ra, mojaro muzlatilsa, Kiyev nazoratidagi hududlarda rus tilida so‘zlashuvchi aholi qoladi. U ularning rus tilida ta’lim olishi va rus madaniyatini saqlab qolishi kerakligini aytdi hamda bu odamlar "Zelenskiy va uning jamoasiga yemish" bo‘lib qolishini ta’kidladi.
Lavrov Ukrainada safarbarlik usullarini ham tanqid qilib, odamlarni ko‘chalarda ushlab, harbiy xizmatga jo‘natish holatlariga e’tibor qaratdi. Uning fikricha, safarbarlik doirasi keyinchalik ayollarga ham kengayishi mumkin.
Lavrov Zelenskiyning Rossiya havo hududida fuqaro aviatsiyasiga qarshi dronlardan foydalanish haqidagi bayonotini "ochiq terrorchilik tahdidi" deb atadi va bu Kiyev rejimining "jinoiy mohiyati"ni ko‘rsatishini bildirdi.
Diplomat Rossiya Ukrainadagi mojaroni tugatishdan manfaatdorligini va bu borada yordam berishga intilayotgan davlatlarning sa’y-harakatlarini qadrlashini qo‘shimcha qildi.
