MDH yoshlarni kasbga yo‘naltirish bo‘yicha tavsiyalar tayyorlanmoqda
© Sputnik / Artem Praxin
/ Obuna bo‘lish
MDH mamlakatlari uchun Bolalar va yoshlarni kasb-hunarga yo‘naltirish bo‘yicha tavsiyalar konsepsiyasi loyihasi ko‘rib chiqildi.
TOShKENT, 8-iyun — Sputnik. Mustaqil Davlatlar Hamdo‘stligi (MDH) yoshlarni kasbga yo‘naltirish bo‘yicha tavsiyalar tayyorlanmoqda. Bu haqda MDH PA huzuridagi Fan va ta’lim bo‘yicha ekspert kengashining navbatdagi majlisida ma’lum qilindi.
MDH mamlakatlari Parlamentlararo assambleyasi huzuridagi Fan va ta’lim bo‘yicha ekspert kengashining navbatdagi majlisi bo‘lib o‘tdi. Tadbir Hamdo‘stlik mamlakatlarining yetakchi ekspertlari, hokimiyat organlari, ilmiy va ta’lim hamjamiyatlari vakillarini birlashtirdi.
Majlisda MDH mamlakatlari uchun Bolalar va yoshlarni kasb-hunarga yo‘naltirish bo‘yicha tavsiyalar konsepsiyasi loyihasi ko‘rib chiqildi.
Hujjat "kasbiy o‘z taqdirini o‘zi belgilashga tayyorlik," "ta’lim bo‘yicha kasbga yo‘naltirish" yoki "kasbiy sinov" kabi asosiy atamalar haqida umumiy tushunchani shakllantirishga qaratilgan. Yagona ta’riflar jarayonning barcha ishtirokchilariga - pedagoglardan tortib qonun chiqaruvchilargacha - bitta tilda gaplashish va bitta koordinatalar tizimida ishlash imkonini beradi.
“Hujjat mamlakatlarga zamonaviy erta kasbga yo‘naltirish tizimlarini, jumladan, Rossiyaning "Kelajakka chipta" tizimi yoki Qozog‘istonning EduNavigator xizmati kabi onlayn platformalarni, o‘yin va amaliy usullarni - kasbiy sinovlar sikllarini, karyera o‘yinlarini, shuningdek, real ish beruvchilar va murabbiylar ishtirokidagi loyihalarni joriy etishga yordam beradi”, — deyilgan xabarda.
Yana bir muhim vazifa - MDH mamlakatlari o‘rtasidagi hamkorlikni rivojlantirish. Yondashuvlarni birlashtirish orqali davlatlar Belarusning "Kasbga qadam" raqamli xizmati, Ozarbayjonning kasbiy yo‘naltirilgan sinflari, Rossiyaning Texnootradlari va Qirg‘izistonning Beeline dasturi kabi muvaffaqiyatli tajribalar bilan almashishlari mumkin bo‘ladi.
“MDH davlatlarida bu sohaning rivojlanish darajasi turlicha ekani, ayrimlar raqamli platformalarni joriy qilgan bo‘lsa, boshqalari endi boshlayotgani ta’kidlandi. Sa’y-harakatlarni birlashtirish takrorlanishning oldini olish, tajriba almashish va natijalarga tezroq erishish imkonini beradi”, — deyiladi xabarda.
Bundan tashqari, kasbga yo‘naltirish nafaqat kasb tanlashda yordam beradi, balki o‘zgarishlarga moslasha oladigan, yangi kompetensiyalarni o‘zlashtiradigan va o‘z “karyera”sini ongli ravishda quradigan shaxsni shakllantirish vositasiga aylanadi.
“Bu iqtisodiyotga bevosita ta’sir ko‘rsatadi: yosh mutaxassisning tanlovi qanchalik mazmunli va asosli bo‘lsa, mehnat bozorida unga bo‘lgan talab shunchalik yuqori bo‘ladi, demak, ishsizlik darajasi pasayadi va mehnat unumdorligi oshadi”, — deya qayd etilgan xabarda.
Yig‘ilishda Armaniston, Belarus, Qozog‘iston, Qirg‘iziston, Rossiya va O‘zbekistonda bolalar va yoshlarni kasbga yo‘naltirishni tashkil etish bo‘yicha ilg‘or tajribalar taqdim etildi.
Kengash a’zolari MDHda 2026-2028 yillarga mo‘ljallangan namunaviy qonun ijodkorligining istiqbolli rejasi loyihasiga takliflarni ko‘rib chiqishdi.
Ekspert kengashining navbatdagi yig‘ilishi 2025-yilning kuzida bo‘lib o‘tadi.
