Endi DXX bilan qisqa raqamlar orqali bog‘lanish mumkin — qanday murojaatlar qabul qilinadi?
11:00 15.05.2025 (yangilandi: 13:20 15.05.2025)
© Sputnik / Ramil Sitdikov
/ Obuna bo‘lish
DXX: tuhmat va haqoratdan iborat murojaat berganlik belgilangan tartibda javobgarlikka sabab bo‘ladi.
TOShKENT, 15-may — Sputnik. Endi O‘zbekiston Davlat xavfsizlik xizmati bilan (DXX) qisqa raqamlar orqali bog‘lanish mumkin, deya xabar berdi DXX matbuot xizmati.
“O‘zbekiston Respublikasining “Davlat xavfsizlik xizmati to‘g‘risida”gi qonuniga muvofiq, DXX vakolatlariga kiritilgan masalalar yuzasidan jismoniy va yuridik shaxslarning murojaatlarini tezkor ravishda qabul qilish maqsadida Call-markaz faoliyat yurita boshladi”, — deyiladi xabarda.
Call-markazga 1520 qisqa raqami orqali qo‘ng‘iroq qilish mumkin.
Quyidagi masalalar yuzasidan murojaatlar qabul qilinadi:
O‘zbekistonning konstitutsiyaviy tuzumi, suvereniteti va hududiy yaxlitligiga bo‘lgan tajovuzlar haqida;
davlat chegarasini qo‘riqlanishi va himoya qilinishiga bo‘ladigan tahdidlar;
Qurolli Kuchlar va mudofaa-sanoat majmuasida davlat xavfsizligiga bo‘ladigan tahdidlar;
terrorizm, ekstremizm, uyushgan jinoiy guruhlarga oid;
qurol-yarog‘, giyohvandlik vositalari va psixotrop moddalarning noqonuniy aylanmasiga doir jinoyatlar haqida;
davlat manfaatlariga tahdid soluvchi korrupsiya va iqtisodiy jinoyatlar yuzasidan;
milliy, etnik va diniy adovatni targ‘ib etish;
davlat manfaatlari va xavfsizligiga tahdid soluvchi huquqbuzarliklarning sodir etilishiga doir boshqa axborotlar.
Shu bilan birga, Jinoyat-protsessual kodeksining 345-moddasida belgilab qo‘yilgan va tergovi DXX vakolatiga kiritilgan Jinoyat kodeksining 150-163, 182, 223, 246-moddalarida nazarda tutilgan jinoyatlarga doir masalalar yuzasidan murojaatlar qabul qilinadi.
“Hurmatli fuqarolar, eslatib o‘tamizki "Jismoniy va yuridik shaxslarning murojaatlari to‘g‘risida"gi qonunning 38-moddasiga asosan, mazkur qonunni buzganlik, xuddi, shuningdek, tuhmat va haqoratdan iborat murojaat berganlik belgilangan tartibda javobgarlikka sabab bo‘ladi”, — deya qayd etilgan xabarda.
Murojaat qilgan fuqarolarning shaxsi sir saqlanishi kafolatlanadi.
Xabarda atrofdagi qonunbuzarliklarga nisbatan befarq bo‘lmaslik so‘ralgan.
