Norasmiy sammit: Putin MDH yetakchilari bilan uchrashuvda qanday fikrlar bildirdi?
16:38 25.12.2024 (yangilandi: 16:53 25.12.2024)
© Sputnik / Kristina Kormilisina
/ Obuna bo‘lish
Vladimir Putin Sankt-Peterburgda MDH davlat rahbarlarining Yangi yil oldidan an’anaviy norasmiy sammitida nutq so‘zladi.
TOShKENT, 25 dek — Sputnik. Yil yakuniga ko‘ra MDH mamlakatlari yalpi ichki mahsulotining o‘sishi 4,7 foizni tashkil etadi, dedi Rossiya prezidenti Vladimir Putin MDH davlatlar rahbarlarining norasmiy uchrashuvida.
Putin MDHga a’zo davlatlar davlat rahbarlarining norasmiy uchrashuvini ochar ekan, Oqtovdagi samolyot halokati munosabati bilan hamdardlik bildirdi. Uning so‘zlariga ko‘ra, Rossiya FVVning samolyoti shifokorlar va zarur uskunalar bilan Qozog‘istonga yuboriladi.
"Shunday qilib, 2024-yil oxiriga kelib, Hamdo‘stlik mamlakatlari yalpi ichki mahsulotining o‘sishi 4,7 foizni tashkil etishi prognoz qilinmoqda - bu o‘rtacha jahon ko‘rsatkichidan yuqori", — dedi Putin.
Rossiya prezidentining qayd etishicha, MDH davlatlari jinoyatchilik, terrorizm va giyohvand moddalar savdosiga qarshi kurashda hamkorlikni kuchaytirmoqda.
“Hamdo‘stlik mamlakatlari ekstremizm, transchegaraviy jinoyatlar va giyohvand moddalar savdosiga qarshi kurashda hamkorlikni kuchaytirmoqda. Huquqni muhofaza qiluvchi organlarning kundalik faoliyati va aloqalari tartibga solindi”, — dedi Rossiya yetakchisi.
Putin o‘z so‘zida MDHda ixtiyoriy va notijorat tashkilotlari uyushmasini tashkil etishni qo‘llab-quvvatladi. Shuningdek, MDH davlat rahbarlarini 2025-yilda Moskvada bo‘lib o‘tadigan G‘alabaning 80-yilligi munosabati bilan o‘tkaziladigan tantanalarga shaxsan taklif qildi.
Vladimir Putin quyidagilarni ma’lum qildi:
MDHda import o‘rnini bosish yaxshi sur’atlar bilan rivojlanmoqda, Hamdo‘stlik davlatlarining texnologik suvereniteti mustahkamlanmoqda;
Ishonchim komilki, biz ijtimoiy-iqtisodiy rivojlanish, barqarorlik va xavfsizlikni mustahkamlash borasidagi muammolarni hal etishda bundan keyin ham hamkorlikda ishlaymiz;
MDH davlatlari o‘rtasidagi tijorat to‘lovlarida milliy valyutalarning ulushi bugungi kunda 85 foizdan oshadi va bizning mustaqil to‘lov tizimlarimizdan tobora ko‘proq foydalanilmoqda.
