Chet elda mehnat qilayotgan o‘zbekistonliklar bilan muloqot kuchaytiriladi
© Sputnik / Aleksandr Krajev
Obuna bo‘lish
Yoshlar ishlari agentligi “Work and Travel” kabi dasturlardan foydalanadigan talabalar uchun yo‘lkira xarajatlariga ssuda ajratishni yo‘lga qo‘yadi.
TOShKENT, 8 dek — Sputnik. Chet elda mehnat qilayotgan o‘zbekistonliklar bilan muloqot kuchaytiriladi. Bu haqda prezident Shavkat Mirziyoyev raisligida o‘tgan aholini talab yuqori kasblarga o‘qitish va daromadli ish bilan ta’minlash chora-tadbirlari bo‘yicha kengaytirilgan yig‘ilishda ma’lum qilindi.
So‘nggi besh yilda sanoat korxonalariga 24 milliard dollarlik uskunalar olib kelinib, 63 mingta yangi quvvat ishga tushirilgan, 1 million 500 mingta doimiy ish o‘rni yaratilgan. Hozirda iqtisodiyot tarmoqlarida 200 mingdan ortiq malakali mutaxassisga talab bor.
“Kelgusi uch yilda investitsiya dasturlari doirasida ishga tushadigan korxonalarda yana 500 ming nafar ishchiga talab yuzaga keladi. Yangi uskunalar va texnologiyalarda ishlash uchun malakali kadrlar suv va havodek zarur”, — deyiladi xabarda.
Asaka transport va mashinasozlik texnikumi, Buxoro shahar energetika, neft va gaz sanoati texnikumi, Shirin energetika texnikumi, G‘uzor tumani va Shahrisabz shahri 1-son texnikumlarida mahalliy va xorijiy korxonalar bilan hamkorlikda zamonaviy mutaxassislar tayyorlanmoqda.
Shu bilan birga, xususiy korxonalarni qo‘llab-quvvatlash, ularga manfaatli sharoit qilib berish orqali dual ta’lim qamrovini oshirish bo‘yicha chora-tadbirlar belgilab berildi.
Maktablar va kasb-hunarga o‘qitish markazlarida bunday darslarni ko‘paytirish, texnikumlarga xorijdan o‘qituvchilar olib kelish bo‘yicha ko‘rsatmalar berildi.
Kambag‘allikni qisqartirish va bandlik vazirligi tizimidagi 65 ta kasbiy ko‘nikma markazida o‘qitish sifatini oshirish, grantlar jalb etib, zamonaviy kasblarga mos uskunalar bilan jihozlash kerakligi aytildi.
Quyidagilar amalga oshiriladi:
Viloyatlardagi 13 ta qurilish kasbiga o‘qitish markazi dasturlari ham mehnat bozoridagi talab yuqori kasblarga moslashtiriladi. Qabul tizimi raqamlashtirilib, yiliga 20 ming fuqaro kasbga tayyorlanadi.
Kasblarni mustaqil yoki shogirdlikka tushib o‘rganganlarga xalqaro tan olinadigan sertifikatlar berish yo‘lga qo‘yiladi. Buning uchun hududlarda 5 ta Kasbiy malakani baholash markazi tashkil qilinadi.
“Rivojlangan davlatlarda talabalar uchun “Work and Travel” kabi ko‘plab dasturlar bor. Jumladan, O‘zbekistonlik yoshlar ta’til vaqtida chet elga borib, ham bilim olayapti, ham daromad topayapti. Bu dasturlardan foydalanish imkoniyatini oshirish maqsadida, kelgusi yildan Yoshlar ishlari agentligi tomonidan talabalarning yo‘lkira xarajatlari uchun ssuda ajratish yo‘lga qo‘yilishi aytildi”, — deya qayd etilgan xabarda.
Bundan tashqari, chet elda mehnat qilayotgan o‘zbekistonliklar bilan muloqotni kuchaytirish, ularning ko‘proq oylik olishiga sharoit yaratish hamda ijtimoiy va huquqiy qo‘llab-quvvatlash lozimligi qayd etildi.
Yig‘ilishda ishsiz aholini talab yuqori kasblarga o‘qitish, xorijdan qaytganlarning bandligini ta’minlash bo‘yicha aniq vazifalar belgilandi.
