Aholiga psixologik yordam ko‘rsatish sohasi huquqiy jihatdan tartibga solinadi
12:17 20.09.2024 (yangilandi: 12:26 20.09.2024)
© Press-slujba Senata Oliy Majlisa
Obuna bo‘lish
Qonunning qabul qilinishi xususiy tarzda amaliyot olib borayotgan psixologlar faoliyatini qonuniy amalga oshirilishini ta’minlashga xizmat qiladi.
TOShKENT, 20 sen — Sputnik. O‘zbekistonda aholiga psixologik yordam ko‘rsatish sohasi huquqiy jihatdan tartibga solinmoqda. Bu haqda O‘zbekiston Oliy Majlisi Senati matbuot xizmati xabar berdi.
Bugun Toshkent shahrida Senatning ellik yettinchi yalpi majlisi o‘tkazilmoqda. Unda “Aholiga psixologik yordam ko‘rsatish to‘g‘risida”gi qonun ko‘rib chiqildi.
Ta’kidlanishicha, respublikaning 10 ta oliy ta’lim muassasasida “Psixologiya”, 19 ta oliy ta’lim muassasasida “Pedagogika va psixologiya” ta’lim yo‘nalishlari va mutaxassisliklari, oliy tibbiy ta’lim muassasalarida “Tibbiy psixologiya” va “Tibbiy psixoterapiya” mutaxassisliklari bo‘yicha kadrlar tayyorlash yo‘lga qo‘yilgan.
Aholiga psixologik yordam ko‘rsatish sohasi huquqiy jihatdan tartibga solinmoqda
© Press-slujba Senata Oliy Majlisa
Hozirgi kunda maktabgacha ta’lim tizimida 2,5 mingdan, umumiy o‘rta ta’lim maktablarida 13 mingdan ziyod pedagog-psixologlar faoliyat olib bormoqda. Shu bilan birga, psixologiya yo‘nalishida maslahat berish, onlayn va oflayn formatda o‘quv, trening, seminarlar o‘tkazish orqali xususiy tartibda psixologik yordam ko‘rsatish faoliyati ham keng tarqalgan.
Qonun bilan aholiga psixologik yordam ko‘rsatishning asosiy prinsiplari, vazifalari, turlari, shakllari hamda standartlari belgilanmoqda. Qonunda psixologik yordam ko‘rsatish standartlari Sog‘liqni saqlash vazirligi tomonidan ishlab chiqilishi va tasdiqlanishi hamda psixologik yordam ko‘rsatish faoliyati bilan shug‘ullanuvchi yuridik shaxs rahbari psixologiya sohasida oliy ma’lumotga ega bo‘lishi kerakligi nazarda tutilmoqda.
Psixologik yordam ko‘rsatish sohasi ishtirokchilarining huquq va majburiyatlarini belgilash, bepul psixologik yordam ko‘rsatiladigan shaxslar toifalarini aniqlashtirish, aholiga psixologik yordam ko‘rsatish sohasidagi professional uyushmalari faoliyatining huquqiy asoslarini yaratish ko‘zda tutilyapti.
Shuningdek, psixologiya yo‘nalishidan boshqa oliy ma’lumotga ega bo‘lgan shaxslar xususiy tartibda psixologik yordam ko‘rsatish faoliyati bilan shug‘ullanishdan avval psixologiya mutaxassisligi uchun qayta tayyorlovdan o‘tishi kerakligi belgilanmoqda.
Ma’muriy javobgarlik to‘g‘risidagi kodeks psixologik yordamni bunday huquqqa ega bo‘lmagan shaxs tomonidan ko‘rsatish yoxud aholiga psixologik yordam ko‘rsatish to‘g‘risidagi qonunchilikda belgilangan cheklovlarga rioya etmaslik uchun javobgarlikni nazarda tutuvchi qo‘shimcha normalar bilan to‘ldirilmoqda.
Qayd etilishicha, mazkur qonunning qabul qilinishi aholiga psixologik yordam ko‘rsatish sohasining huquqiy asoslarini yaratilishi, fuqarolarning psixologik yordam olishga bo‘lgan ehtiyojini qondirish, xususiy tarzda amaliyot olib borayotgan psixologlar faoliyatini qonuniy amalga oshirilishini ta’minlashga xizmat qiladi.
Muhokamadan so‘ng qonun senatorlar tomonidan ma’qullandi.
