O‘zbekiston va Ozarbayjon tovar ayirboshlash hajmini 3 barobarga oshirdi
11:18 22.08.2024 (yangilandi: 14:22 22.08.2024)
Obuna bo‘lish
Eksklyuziv
Forumga Ozarbayjondan 67 kompaniya, shuningdek, 10 ga yaqin davlat tashkilotlari tashrif buyurdi.
TOShKENT, 22 avg — Sputnik. O‘zbekiston va Ozarbayjon kelgusi yoki ikki yil ichida tovar ayirboshlash hajmini 1 milliard dollarga yetkazishni rejalashtirmoqda. Bu haqda Toshkentda bo‘lib o‘tayotgan O‘zbekiston-Ozarbayjon biznes-forumida ma’lum qilindi, deya xabar berdi Sputnik O‘zbekiston muxbiri.
Toshkentda O‘zbekiston-Ozarbayjon biznes-forumi o‘z ishini boshladi.
Unda kirish so‘zi bilan O‘zbekiston investitsiyalar, sanoat va savdo vaziri Laziz Qudratov va Ozarbayjon iqtisodiyot vaziri Mikail Jabbarov ishtirok etdi.
Forumga Ozarbayjondan 67 ta kompaniya, shuningdek, 10taga yaqin davlat tashkilotlari tashrif buyurdi.
“Oxirgi 5-yilda O‘zbekiston va Ozarbayjon o‘rtasidagi tovar ayirboshlash hajmi 3 barobar oshdi. Joriy yil boshidan buyon o‘zaro tovar ayirboshlash hajmi yana 20 foizga oshdi. Mutlaq qiymatlar hali ham oddiy bo‘lib qolmoqda, ammo biz kelgusi yoki ikki yil ichida bu ko‘rsatkichlarni 1 milliard dollarga yetkazishni maqsad qilganmiz”, — deydi Laziz Qudratov.
Uning qayd etishicha, O‘zbekiston va Ozarbayjon turli sohalarda – energetika, shaharsozlik, mashinasozlik, to‘qimachilik va ipakchilik sanoati, qishloq xo‘jaligida faol hamkorlik qilmoqda.
Bugungi kunda hamkorlikning ustuvor yo‘nalishlari quyidagilardan iborat:
o‘zaro tovar ayirboshlashni ko‘paytirish va diversifikatsiya qilish, import o‘rnini bosishni amalga oshirish masalalari, jumladan, mamlakatlarda ishlab chiqarilayotgan tovarlarni yanada faol sotishga xizmat qiluvchi ikki davlat hududlarida infratuzilmani yaratish, tovarlarni maxsus elektron platformalarda joylashtirish.
"Bu boradagi aniq qadamlar qatorida ikki davlat – Boku, Shusha, Toshkent va Samarqand shaharlarida savdo uylari, ko‘rgazma zallari, doimiy milliy pavilonlar ochish rejalarini alohida ta’kidlamoqchiman", — dedi u.
Bundan tashqari, tomonlar sanoat kooperatsiyasini faol rivojlantirish niyatida.
Tog‘-kon sanoatida loyihalarni amalga oshirish. O‘zbekiston Ozarbayjon hududida mineral-xom ashyo resurslarini o‘zlashtirish va qayta ishlashga, shu jumladan qurilish materiallari ishlab chiqarishga va Qorabog‘ hududidagi restavratsiya ishlarida foydalanishga tayyor.
"O‘z navbatida, biz Ozarbayjon kompaniyalarini rangli metallar, jumladan, mis konlarini o‘zlashtirish va qazib olishda ishtirok etishga taklif qilamiz. Energetika va neft-gaz sohalarida hamkorlik yaxshi sur’atga ega. Biz yashil energiya ishlab chiqarish va uni Ozarbayjon orqali Yevropa davlatlariga eksport qilish loyihasi ustida ishlayapmiz. O‘zbekistondagi Usturt platosida geologik qidiruv ishlarini boshlayapmiz",— deya qo‘shimcha qildi vazir.
Qishloq xo‘jaligida ham salohiyatni birgalikda rivojlantirish mumkin. Bog‘lar, issiqxona majmualari barpo etish, quritilgan mevalar yetishtirish, yong‘oq yetishtirish bo‘yicha allaqachon ishlanmalar mavjud.
"Yaxshi yo‘lga qo‘yilgan transport va logistika kommunikatsiyalari biz kutgan natijalarni bermoqda. Hududda har ikki yo‘nalishda ham yuk tashish hajmi barqaror ravishda 25-30 foizga oshib borayotganini ko‘rmoqdamiz", — deya qayd etdi Ozarbayjon Iqtisodiyot vaziri Mikail Jabborov.
Ma’lumot uchun, 2023-yilda tovar ayirboshlash hajmi 26,5 foizga o‘sib, 231,6 million dollarni tashkil etdi. Bugungi kunda O‘zbekistonda Ozarbayjon kapitali ishtirokidagi 236 tadan ortiq korxona, Ozarbayjonda esa 70 tadan ortiq o‘zbek kompaniyasi o‘z faoliyatini olib bormoqda.
Eslatib o‘tamiz, O‘zbekiston prezidenti Shavkat Mirziyoyevning taklifiga binoan Ozarbayjon prezidenti Ilhom Aliyev 22-23 avgust kunlari davlat tashrifi bilan respublikada bo‘ladi.
