Eng yomoni ro‘yobga chiqmoqda. Ukraina qarshi hujumi nimani ko‘rsatdi
© Sputnik / RIA Novosti
/ Obuna bo‘lish
Britaniyaning "Sky News" telekanali ikki haftalik hujumning noaniq natijalarini minalangan maydonlar bilan oqlamoqda.
TOShKENT, 19-iyun — Sputnik. G‘arb OAV ogohlantirmoqda: qarshi hujumning muvaffaqiyatsizligi Kiyevga qimmatga tushadi. NATO ittifoqchilari moliyalashtirishni, qurol-yaroq yetkazib berishni qisqartiradi va Ukraina Qurolli kuchlari (UQK) oldingidek shiddat bilan jangovar harakatlarni davom ettira olmaydi.
Reja ish bermadi
Kiyev rejimi o‘tgan yilning kuzidan beri qarshi hujum haqida xabar berib kelgan edi. Uni qishda, keyin bahorda kutishdi, ammo UQK faqat iyun oyining boshida oldinga siljishni boshladi, deya yozadi RIA Novosti kolumnisti.
Maksimal vazifa Qrimni egallash deb hisoblangan, qoniqarli kutilgan natija – yarim orolga quruqlik yo‘lagini yo‘q qilish edi. Ammo, ma’lum bo‘lishicha, hatto tutashuv chizig‘idagi “kulrang” zonani yengib o‘tish bilan ham, zarba guruhlari muammolarga duch kelishmoqda.
"The Washington Post" nashrining yozishicha, UQK bir vaqtning o‘zida bir necha yo‘nalishda hujum qilyapti. Jangga NATO metodikasi bo‘yicha tayyorlangan va G‘arb qurollari bilan qurollangan bo‘linmalar kirishgan. Vaziyat hali ham aniq emas. Amerikalik jurnalistlarning fikricha, Kiyevga aniq natijaga erishish uchun bir necha oy kerak bo‘ladi.
Britaniyaning "Sky News" telekanali ikki haftalik hujumning noaniq natijalarini minalangan maydonlar bilan oqlamoqda. Bundan tashqari, rus armiyasi yaxshi himoyalangan va taktik chiziqlar o‘rtasida manyovr qilmoqda, bu esa hujumchilar uchun qimmatga tushmoqda. Umuman olganda, G‘arbning zirhli texnikasi, jumladan, og‘ir texnikasi keng qo‘llanilishiga qaramay, operatsiyaning muvaffaqiyati shubha ostida.
"Bild" harbiy kuzatuvchisi Yulian Repkening ta’kidlashicha, UQK DXRda biroz oldinga siljishdi, ammo Zaporojye viloyatida vaziyat yomonroq. Orexovo shahri yaqinida G‘arb tahlilchilarining fikriga ko‘ra, bir hafta ichida Kiyev kamida 7 ta "Leopard 2" tanki va 12 ta "Bradley" piyoda askarlar jangovar mashinasini yo‘qotdi. Lekin 40 mingga yaqin jangchilar hali ham zaxirada.
"Reuters" agentligi UQK asosiy mudofaa chizig‘iga yaqinlashguncha juda katta yo‘qotishlarga duchor bo‘lib, hujumni davom ettira olmasligidan xavotirda. Rus istehkomlarining chuqurligi esa — o‘n - o‘n besh kilometrgacha. Kiyevga “operativ va taktik nogahoniylik” omili yordam berishi mumkin edi, ammo u endi yo‘q.
G‘arb yordam bermaydi
Ammo Chexiya prezidenti, iste’fodagi armiya generali Petr Pavel optimizmga to‘la. Uning so‘zlariga ko‘ra, Ukraina hali hech qanday jiddiy chora qabul qilgani yo‘q va hozirgi jangovar harakatlar faqat tayyorgarlik bosqichidir.
“Harbiy tajribamga asoslanib, men buni shakllantiruvchi operatsiyalar deb atagan bo‘lardim”, - dedi u.
10-12 iyul kunlari NATOning Vilnyusdagi sammitida esa ittifoq, uning fikricha, Kiyevga Isroil bilan bir xil xavfsizlik kafolatlarini beradi. Ya’ni u qurol-yarog‘ bilan ta’minlaydi va harbiy texnologiyalaridan foydalanish imkonini beradi.
O‘z navbatida, YeI harbiy shtab-kvartirasi rahbari Erve Blejan NATO Ukrainaga qo‘shin yubormoqchi emasligini, chunki u mojaro tarafdori emasligini va unga aylanishni istamasligini takrorladi. Shuningdek, Fransiyaning LCI telekanaliga bergan intervyusida u UQK ning qarshi hujumi natijasi qanday bo‘lishidan qat’i nazar, urush davom etishini aytdi. “Ular barcha hududlarni qaytarib olmaydi”, — dedi Blejan.
"Politico" nashri buni AQShda prezidentlik saylovlari yaqinlashayotgani bilan bog‘lamoqda. Bundan tashqari, Vashington qarshi hujumning dastlabki natijalaridan hafsalasi pir bo‘lgan. Kiyev hukumati mojaroning ushbu bosqichi tugaganidan keyingina ular bilan keyingi qurol-yarog‘ yetkazib berishni muhokama qilishga tayyor ekanliklaridan shikoyat qilmoqdalar. “Ukrainani ikki partiyaviy qo‘llab-quvvatlash keskinlashmoqda”, — deb yozadi "The Washington Post".
“Biz hali boshlamadik”
UQK bosh qo‘mondoni Valeriy Zalujniy AQSh shtab boshliqlari birlashgan qo‘mitasi rahbari Mark Millli bilan telefon orqali suhbatda “mudofaa va hujum xarakteridagi” og‘ir janglar haqida ma’lum qildi. U havo mudofaasini kuchaytirishni so‘radi.
Prezident devoni rahbari maslahatchisi Mixail Podolyak: “Biz hali qarshi hujumni boshlaganimiz yo‘q, Rossiya esa allaqachon g‘alaba qozonganini aytmoqda”, — dedi.
Valeriy Zalujniy
© AP Photo / Efrem Lukatsky
Uning so‘zlariga ko‘ra, ayni damda UQK bir nechta vazifalarni hal qilmoqda: imkon qadar ko‘proq Rossiya askarlari va texnikasini yo‘q qilish, shuningdek, kichik bo‘linmalar bilan dushmanni qo‘rqitish va bir necha yo‘nalishda oldinga siljish.
Biroq, hatto Kiyevda ham ko‘pchilik uning gapiga qo‘shilmaydi. Bu G‘arb kutgan qarshi hujum emas, deydi siyosatshunos Konstantin Bondarenko. Mahalliy OAVlardan biriga bergan intervyusida u ukrainaliklar g‘alabali hujumga emas, “qonli qirg‘in”ga tayyorlanishlari kerakligini aytdi.
“Siyosiy va harbiy rahbariyatga nisbatan ko‘p umidsizlik va tanqidlar bo‘ladi. Shu bilan birga, prezident Vladimir Zelenskiy va mish-mishlarga ko‘ra, hozirgi operatsiyani qo‘llab-quvvatlamagan Zalujniy o‘rtasidagi keskinlik sezilarli bo‘lib bormoqda. Shuning uchun quruqlikdagi qo‘shinlar qo‘mondoni Aleksandr Sirskiy maydonga chiqdi”, — deb tushuntirdi Bondarenko.
Ukrainalik siyosatshunos Ruslan Bortnikning fikricha, agar Kiyev Qrimga boradigan quruqlik yo‘lagining bir qismini hujum nazorati ostiga olsa, hech bo‘lmaganda muvaffaqiyat haqida gapirish o‘rinli bo‘lardi. Shu bilan birga, bu operatsiya qanday tugashidan qat’i nazar, undan keyin Turkiyada muzlatib qo‘yilgan muzokaralar 2022-yilning bahorida qayta boshlanishini kutish kerak.
“Ehtimol, Moskva va Kiyev sulhga yaqinlashar. Har holda, Ukraina mustaqillikni saqlab qolishdek strategik maqsadiga erishdi, ammo janglar davom etsa, bu muammo yana dolzarb bo‘lib qoladi”, – dedi u.
Rossiya Federatsiyasi hukumati qoshidagi Moliya universiteti eksperti Denis Denisov ham muzokaralar qayta jonlantirishni bashorat qilmoqda. “Agar Ukraina qarshi hujumda muvaffaqiyatsizlikka uchrasa, uning ittifoqchilari so‘nggi bir yarim yil ichida olingan barcha harbiy yordam befoyda bo‘ldi, deb qaror qiladi. Milliardlab dollarlar ajratilishi davom etishi mumkin, ammo dividendlar bo‘lmaydi. Rossiya va Ukraina harbiy muxbirlari hamda G‘arb OAVlarining ma’lumotlariga qaraganda, yordam kamayishi mumkin”, – fikr bildirdi u.
Rossiyani jang maydonida mag‘lub eta olmaslik, Kiyev hukumatini tinchlik yoki hech bo‘lmaganda sulh haqida muzokaralarga qaytaradi, deb hisoblaydi Denisov. Ukraina uchun boshqa yo‘l qolmaydi.
