O‘zbekiston va Qatar o‘rtasida 15 ta hujjat imzolandi — foto
15:27 06.06.2023 (yangilandi: 16:34 06.06.2023)
Obuna bo‘lish
O‘zbekiston prezidenti va Qatar Amiri huzurida 15 ta ikki tomonlama hujjatni imzolash marosimi bo‘lib o‘tdi.
TOShKENT, 6-iyun — Sputnik. O‘zbekiston prezidenti Shavkat Mirziyoyev va Qatar Amiri shayx Tamim bin Hamad Ol Soniy huzurida savdo-iqtisodiy, investitsiyaviy, madaniy-gumanitar va boshqa sohalardagi hamkorlikni rivojlantirish va mustahkamlashga qaratilgan 15 ta ikki tomonlama hujjatni imzolash marosimi bo‘lib o‘tdi. Bu haqda Mirziyoyevning matbuot xizmati xabar berdi.
Jumladan, quyidagilar qabul qilindi:
Investitsiyalarni o‘zaro rag‘batlantirish va himoya qilish to‘g‘risida hukumatlararo bitim;
Ikki tomonlama soliqqa tortishning oldini olish hamda daromad va mulk soliqlarini to‘lashdan bosh tortishni bartaraf qilish to‘g‘risida hukumatlararo bitim;
Bojxona ishlarida o‘zaro ko‘mak ko‘rsatish to‘g‘risida hukumatlararo bitim;
Mehnat munosabatlari sohasida hamkorlik to‘g‘risida hukumatlararo bitim;
Diplomatik pasport egalarini viza talablaridan ozod etish to‘g‘risida hukumatlararo bitim;
Oliy ta’lim va ilmiy tadqiqotlar sohasida hamkorlik to‘g‘risida hukumatlararo memorandum;
Madaniyat sohasida hamkorlik to‘g‘risida hukumatlararo memorandum;
Savdo sohasida hamkorlik to‘g‘risida memorandum;
Qishloq xo‘jaligi va oziq-ovqat sohasida hamkorlik to‘g‘risida memorandum;
O‘simliklar karantini va himoyasi sohasida hamkorlik to‘g‘risida memorandum;
Sport va yoshlar ishlari sohasida hamkorlik to‘g‘risida memorandum;
Toshkent va Doxa shaharlari o‘rtasida hamkorlik to‘g‘risida memorandum.
Shuningdek, tashqi ishlar va adliya vazirliklari o‘rtasida 2023-2025 yillarga mo‘ljallangan hamkorlik dasturlari hamda Ustuvor investitsiya loyihalarini moliyalashtirish uchun qo‘shma platforma yaratish to‘g‘risida kelishuv imzolandi.
Eslatib o‘tamiz, Samarqand shahridagi Kongress markazida Mirziyoyev va Qatar Amirining muzokaralari bo‘lib o‘tgandi.
