Toqayev bo‘lajak saylovlarda qaysi siyosiy kuch tomonidan ishtirok etishini aytdi
© Sputnik / Press Service of the President of the Republic of Kazakhstan
/ Obuna bo‘lish
Qozog‘iston prezidenti bo‘lajak saylovlarda qaysi tashkilotdan nomzodini qo‘yishi masalasi jamiyatda alohida qiziqish uyg‘otayotganini aytdi.
TOShKENT, 5 okt — Sputnik. Qozog‘iston prezidenti Qosim-Jomart Toqayev 20-noyabrga belgilangan navbatdan tashqari prezidentlik saylovlariga biron bir tashkilotdan emas, balki keng ijtimoiy-siyosiy kuchlar koalitsiyasidan qatnashishni to‘g‘ri deb hisoblaydi.
“O‘ylaymanki, men saylovga qandaydir aniq tashkilotdan emas, balki mamlakatda amalga oshirilayotgan islohotlarning ijtimoiy asosini tashkil etuvchi ijtimoiy-siyosiy kuchlarning keng koalitsiyasidan qatnashsam, to‘g‘ri bo‘ladi”, deydi Toqayev.
Qozog‘iston prezidenti bo‘lajak saylovlarda qaysi tashkilotdan nomzodini qo‘yishi masalasi jamiyatda alohida qiziqish uyg‘otayotganini ko‘rishini tushuntirdi.
“Ochig‘ini aytaman: menga turli respublika birlashmalari va partiyalaridan ularga nomzod bo‘lish taklifi tushmoqda. Ayniqsa, yoshlar va boshqa jamoat tashkilotlari tashabbus ko‘rsatayotgani meni quvontirdi. Uch yarim yil davomida amalga oshirilayotgan va rejalashtirilayotgan o‘zgarishlar uchun barchaga takliflar, ishonch va strategik yo‘nalishni faol qo‘llab-quvvatlaganliklari uchun minnatdorchilik bildirmoqchiman”, deydi Toqayev.
U mamlakatdagi eng yirik “Amanat” partiyasi raisi lavozimini tark etganini eslagan.
Uning so‘zlariga ko‘ra, prezidentlik saylovi e’lon qilinganidan keyin tayyorgarlik ko‘rish uchun yetarlicha vaqt o‘tgan.
“Bugun biz saylovoldi tashviqoti tobora kuchayib borayotganini ko‘rmoqdamiz. Nomzodlar ko‘rsatilmoqda, partiyalar va ijtimoiy harakatlar faollashmoqda. Ichki siyosiy maydonda jonlanish kuzatilmoqda. Biz barcha asosiy siyosiy institutlarning qayta ishga tushishini ta’minlaydigan yangi saylov sikliga kirdik”, dedi Toqayev.
