Rossiya, Armaniston va Ozarbayjon kelishuviga ko‘ra, bugun 10 ta Il-76 harbiy samolyot yordamida Rossiya tinchlikparvar kuchlari Tog‘li Qorabog‘ga yetib keldi. Rossiya harbiylarining Tog‘li Qorabog‘ga yetib kelish kadrlarini RIA Novosti tarqatdi.
Eslatib o‘tamiz, bir kun oldin 3 davlat rahbariyati 10-noyabr soat 00:00 dan boshlab Tog‘li Qorabog‘ hududida barcha jangovar harakatlarni to‘xtatishga kelishib olishgan edi.
Shuningdek, shartnomaga muvofiq Armaniston 15-noyabrga qadar Ozarbayjonga Kelbajar tumanini, ushbu yilning 1-dekabriga qadar - Lachin tumanini qaytarib berishi kerak. Shu bilan bir vaqtda kengligi 5 km bo‘lgan Lachin koridori Armaniston ixtiyorida qoladi. Ushbu koridor orqali Tog‘li Qorabog‘ bilan aloqa bog‘lanib turiladi. Bu koridor Shusha shahri orqali o‘tmaydi.
Rossiya tinchlikparvar kuchlari Tog‘li Qorabog‘da 5-yil muddatga qoladi, keyinchalik ushbu muddat uzaytirilishi mumkin. Ushbu shartnoma Boku va Yerevan talabiga binoan bekor qilinishi mumkin.
