TOShKENT, 3 noya - Sputnik. Bugun O‘zbekistonda xalqaro innovatsion g‘oyalar haftaligi - InnoWeek boshlandi. Tadbir ilk marotaba onlayn virtual platformada o‘tkazilmoqda, deb xabar qildi Innovatsion rivojlanish vazirligi axborot xizmati.
"Innoweek 2020" - xalqaro innovatsiyalar haftaligi 3-8 noyabr kunlari bo‘lib o‘tadi. Unda O‘zbekistonda yaratilayotgan innovatsiyalar bilan tanishish mumkin. Haftalik doirasida bir qator tadbirlar rejalashtirilgan.
Innoweek 2020 dasturidan quyidagi tadbirlar o‘rin olgan:
- Xalqaro Robototexnika musobaqasi;
- Xalqaro yoshlar innovatsion forumi;
- Osiyo va Tinch okeani texnologiyalar transferi markazi hududiy virtual vorkshopi;
- Yevropa ufqlari (Horizon Europe) doiraviy dasturida ishtirok etish” mavzusidagi vebinar;
- Fanlar akademiyasi ilmiy- tashkilotlari tomonidan yaratilgan ilmiy hajmdor mahsulotlar va innovatsion texnologiyalar onlayn taqdimoti;
- "Ilm-fan va taraqqiyot" mavzusida eng yaxshi jurnalistik maqolalar bo‘yicha tanlov;
- "Innovatsion g‘oyalar yetakchisi" ko‘krak nishoni tanlovi va boshqalar
Barcha tadbirlar ro‘yxati va ularning o‘tkazish jadvali bilan batafsil innoweek.uz sahifasida tanishish mumkin.
Eslatib o‘tamiz, Innoweek - innovatsiyalar haftaligi O‘zbekistonda 2018-yildan buyon o‘tkazib kelinmoqda. Unda o‘zbekistonlik iqtidorli yoshlar, innovatsion mahsulot yaratuvchilari, vazirlik va muassasa vakillari, xorijiy kompaniya va diplomatik vakolatxonalar ishtirok etib kelmoqda. Tadbirning maqsadi - O‘zbekistonda eng zamonaviy texnologiyalarni namoyish qilish va ularni tijorat loyihalariga aylantirish, turdi biznes sohalariga tadbiq etishdir. O‘tgan tadbirlarda qator loyiha va memorandumlar imzolangan.
