TOShKENT, 30 - Sputnik. Nikohga kirish uchun majburan o‘g‘irlangan ayol IIBga murojaat qildi, holat bo‘yicha jinoyat ishi qo‘zg‘atilgan, deb xabar bermoqda O‘zbekiston IIV huzuridagi Tergov departamenti.
Hodisa Qoraqalpog‘iston Respublikasi Qonliko‘l tumanida 13-oktabr kuni sodir bo‘lgan.
Kechga tomon 30 yoshli D.E., tanishlari 29 yoshli R.J. va 30 yoshli P.B.lar bilan oldindan jinoiy til biriktirib, bir guruh bo‘lib, 24 yoshli ayol - G.S.ni uning erkiga xilof ravishda o‘g‘irlab ketishgan.
O‘g‘rilar ayolning orqasidan borib unga kuch ishlatib, majburan "Nexia-2" avtomashinasiga mindirib, Qonliko‘l tumani Bo‘ston OFYda joylashgan uyiga olib borishigan.
O‘g‘irlashdan maqsad G.S.,ni D.E., bilan nikohlash bo‘lgan.
Holat yuzasidan G.S., tuman IIB boshlig‘iga ariza bilan murojaat qilgan. Hodisa joyiga tergov-tezkor guruhi xodimlari chiqib ko‘zdan kechirish va boshqa tergovga qadar tekshiruv harakatlarini o‘tkazishgan. D.E.,ning nomida bo‘lgan “Nexia-2” rusumli avtomashina daliliy ashyo tariqasida olinib, tegishli tartibda muhrlangan.
Mazkur holat yuzasidan Qanliko‘l tumani IIB huzuridagi Tergov guruhi tomonidan O‘zbekiston Respublikasi Jinoyat kodeksining 136-moddasi 1-qismi (Ayolni erga tegishga majbur qilish yoki uning erga tegishiga to‘sqinlik qilish) bilan jinoyat ishi qo‘zg‘atilgan.
Hozirda tergov harakatlari olib bormoqda.
