TOShKENT, 18 okt — Sputnik. Bosh vazir o‘rinbosari Behzod Musayev rahbarligida oliy ta’lim muassasalarida o‘quv jarayonlarni tashkil etish masalalari muhokamasiga bag‘ishlangan videoselektor yig‘ilishi o‘tkazildi.
Oliy va o‘rta maxsus ta’lim vazirligi xabariga ko‘ra, muhokamalarda oliy ta’lim muassasalarida an’anaviy ta’limga qaytish imkoniyatlari masalasi ham ko‘rib chiqildi hamda OTM rektorlariga bu bo‘yicha qator vazifalar belgilab berildi.
Jumladan, oliy ta’lim tizimida an’anaviy darslarga qaytishda, avvalo, talabalar va ularning ota-onalari o‘rtasida so‘rovnomalar o‘tkaziladi.
Shuningdek, OTM tomonidan muassasa imkoniyatlari tahlil qilinadi, sanitariya-epidemiologiya talablari asosida o‘quv jarayonlarini tashkil etish, talabalar salomatligini xavf ostiga qo‘ymasdan talabalar turar joylari faoliyatini tiklash imkoniyatlari ko‘rib chiqiladi.
Bu borada yakuniy qaror oliy ta’lim muassasalari kengashi tomonidan talabalar, ularning ota-onalari takliflarini inobatga olgan holda sanitariya-epidemiologiya xizmati tegishli xulosasi asosida qabul qilinadi.
“So‘rovnomalar natijalariga ko‘ra hamda OTM imkoniyatlaridan kelib chiqqan holda respublikadagi oliy ta’lim muassasalarida an’anaviy ta’lim shakliga ruxsat etiladi”, - deyilgan xabarda.
