TOShKENT, 16 okt — Sputnik. Qirg‘iziston prezidenti Sooronbay Jeenbekov "Ala-Archa" davlat qarorgohida bo‘lib o‘tayotgan JK yig‘ilishida o‘z iste’fosi haqida e’lon qildi.
"Mana shu uch yil davomida menga ishonch bildirgan va qo‘llab-quvvatlagan barcha qirg‘izistonliklarga, birga ishlagan hukumatning barcha bo‘g‘inlariga, davlat va mahalliy organlariga, o‘z apparatimga, fuqarolik jamiyatiga va media sohasiga ulkan minnatdorligimni bildiraman. Mamlakat va xalq taqdiri uchun mas’uliyatni o‘z zimmasiga olgan yangi hukumatga muvaffaqiyatlar tilayman", - dedi Jeenbekov.
Parlamentariylar qarshisida qilgan chiqishi davomida Jeenbekov o‘zidan prezidentlik vakolatlarini sokit qilayotganini bildirdi.
Uning aytishicha, vaziyatni barqarorlashtirish uchun juda ko‘p ishlar amalga oshirildi, shu bilan birga ko‘pchilik, davlat uchun bunday murakkab bir vaziyatda prezident iste’fo berishga haqli emasligi haqida fikrlarni bildirgan.
"Ammo men uchun mamlakatimizning yaxlitligi, xalq birdamligi, jamiyatimizdagi totuvlik barchasidan ustun. Har bir fuqaro salomatligi, har bir yurtdoshimizning hayoti - men uchun eng qadrli. Men mamlakatimizdagi tinchlikni saqlash va jamiyatimizda parokandalik yuz bermasligi uchun prezident lavozimidan ketishga qaror qildim. Bu qaror to‘g‘ri edimi - buni tarix va vaqt ko‘rsatadi", - dedi Jeenbekov.
Jeenbekov Alloh va xalq oldida vijdoni pokligini aytdi, o‘tgan yillar davomida turli lavozimlarda faoliyat yuritgan vaqtlarida orttirgan tajribani esa bundan keyin ham xalq manfaatlari yo‘lida ishlatish niyatidaligini ma’lum qildi.
Prezident nutqidan so‘ng JK deputatlari Jeenbekovni tik turgan holda olqishlashdi.
