TOShKENT, 27 sen — Sputnik. 28-29 sentabr kunlari Xalqaro axborotdan umumiy foydalanish kuni (The International Day for Universal Access to Information, IDUAI) ni nishonlashga bag‘ishlangan yuqori darajali onlayn muhokama bo‘lib o‘tadi. Bu haqda Turizmni rivojlantirish qo‘mitasi matbuot xizmati xabar qilmoqda.
“Jonni omon saqlab, ishonchni mustahkamlab, umid bag‘ishlab axborot olish” mavzuyidagi onlayn muhokamada YuNESKO bosh direktori Odri Azule, O‘zbekiston bosh vazir o‘rinbosari, YuNESKO ishlari bo‘yicha milliy komissiya raisi Aziz Abduhakimov va boshqalar ishtirok etadi.
Tadbir Jahon sog‘liqni saqlash tashkiloti, Xalqaro arxivlar kengashi, BMT Taraqqiyot dasturi, “Twitter” ijtimoiy tarmog‘i, “Ochiq hukumat” hamkorligi tashabbusi, “Transparency International” ilmiy-ishlab chiqarish birlashmasi kabi yetakchi tashkilot va tuzilmalarning rahbariyati ishtirokida o‘tkazilmoqda.
“Shu o‘rinda O‘zbekiston bu kabi nufuzli forumga taklif qilingan yagona mamlakat ekanini ta’kidlash muhim. Bu O‘zbekiston prezidenti Shavkat Mirziyoyev tomonidan shaffoflik va erkin fikrlilikni ta’minlash yo‘lida olib borilayotgan siyosat natijasida mamlakatimizda ro‘y bergan o‘zgarishlar e’tirofdir”, - deyilgan xabarda.
