TOShKENT, 19 avg - Sputnik. O‘zbekistonda sentabr oyidan aholini gripp va pnevmoniyaga qarshi emlash boshlanadi, deb xabar qildi Koronaviursga qarshi kurash shtabi a’zosi, epidemiolog Rustam Ikromov "Shifobaxsh" kanaliga.
Shifokor aytishiga ko‘ra, har yili kuz va qish faslida havo tomchi orqali yuqadigan odatiy gripp va nafas olish yo‘llari virusli shamollash holatlari tabiiy ravishda ko‘payishi kuzatiladi. Kuz va qishda ushbu viruslar koronavirus bilan birgalikda yanada kuchli kasallikka aylanishi mumkin.
"Bu shifokorlar tilida mikst-infeksiya deyiladi ya’ni qo‘shilib kasallik chaqirishi mumkin bo‘lgan holat kuzatilishi mumkin. Gripp va pnevmoniya chaqiruvchi virusli kasalliklarni koronavirus bilan birgalikda kelishi virusni kuchayishini va bundan ham og‘irroq darajaga olib kelishini taxmin qilish mumkin", – dedi mutaxassis.
Uning alohida ta’kidlashicha, ayni kunlarda gripp va pnevmaniyaga qarshi emlash uchun hukumat darajasida kerakli chora-tadbirlar olib borilmoqda. Vaksinalarni chetdan olib kelish va joylarda emlash punktlarini tashkil qilish ishlari yuzasidan chora-tadbirlar ishlab chiqilgan. Ommaviy vaksinatsiya sentabr oyidan boshlanishi rejalashtirilgan.
