TOShKENT, 16-iyul — Sputnik. Yanvar-iyun oylarida ichki valyuta bozoridagi holat xorijiy valyutaga bo‘lgan talab hajmining o‘sishi hamda taklif hajmining nisbatan kamayishi sharoitida shakllandi. Bu haqda Markaziy bank xabar qildi.
Xususan, hisobot yili boshidan milliy valyuta kursi 7,2 foizga, iyun oyida esa 0,4 foizga qadrsizlandi.
Ma’lum bo‘lishicha, joriy yilning I yarim yilligida ichki valyuta bozoridagi operatsiyalarning umumiy hajmi 8,2 mlrd AQSh dollarini tashkil etgan. 2018 va 2019-yillarning tegishli davrlariga nisbatan mos ravishda 1,8 va 1,2 baravarga o‘sgan.
Eslatib o‘tamiz, avvalroq aholining xorijiy valyuta sotib olishi 3 baravarga oshgani xabar qilingan edi.
