TOShKENT, 5-iyul — Sputnik. Toshkent viloyatida giyohvand moddasini tayyorlagan ikki yigit qo‘lga tushdi.
IIV huzuridagi Tergov departamenti xabariga ko‘ra, 27-iyun kuni Yuqori Chirchiq tumani IIB xodimlari “Qora dori-2020” tadbirini o‘tkazgan. Unda 22 yoshli B.Sh. va S.I.lar Yuqori Chirchiq tumani Baliqchi mahallasidagi qabriston yonida joylashgan dala maydonida nasha o‘simligiga o‘xshash giyohvandlik moddasini qozonda qovurayotgani aniqlangan.
Sudga oid kimoviy ekspertizasi xulosasiga ko‘ra, olingan modda giyohvandlik vositasi. U vazni 1506 gramm bo‘lgan marixuana.
Tergov harakatlari davomida B.Sh. va S.I.lar ushbu giyohvandlik vositasini o‘zlari bir hafta davomida iste’mol qilishlari uchun tayyorlayotganliklari aniqlangan.
Jinoyat kodeksining 276-moddasi 2-qismi “a” bandi bilan jinoyat ishi qo‘zg‘atilgan.
Tergov harakatlari olib borilmoqda.
