TOSHKENT, 28 iyun — Sputnik. Oʻzbekistonda qishloq xoʻjaligi texnikalari majburiy tartibda sinovdan oʻtkaziladi. Bu prezident qarorida koʻzda tutilgan.
Qarorga muvofiq, 2021 yil 1 yanvardan boshlab:
- import qilinadigan hamda mahalliy korxonalar tomonidan ishlab chiqariladigan barcha turdagi qishloq xoʻjaligi va melioratsiya texnikalari hamda ularning agregatlari va butlovchi qismlari majburiy tartibda sinovdan oʻtkaziladi;
- ushbu teknika, agregat, butlovchi qismlar takomillashtirilganda hamda ularga qoʻshimcha funktsiyalarni bajarish yuklatilganda takroriy sinovlarga taqdim etiladi;
- Oʻzbekiston hududida foydalanishga tavsiya qilingan qishloq xoʻjaligi va melioratsiya texnikalarining yagona davlat reyestriga kiritilgan qishloq xoʻjaligi va melioratsiya texnikalaridan respublikada ekinlarni yetishtirishda foydalanishga ruxsat etiladi;
- qishloq xoʻjaligi va melioratsiya texnikalarining agregatlari va butlovchi qismlari uchun muvofiqlik sertifikatlarini rasmiylashtirish tizimi yoʻlga qoʻyiladi.
2023 yil 1 yanvarga qadar Oʻzbekistonda ishlab chiqarilmaydigan, belgilangan tartibda tasdiqlanadigan roʻyxat boʻyicha olib kelinadigan sinov uskunalari va oʻlchash vositalari bojxona bojidan ozod qilinadi.
