TOShKENT, 7-may — Sputnik. Birlashgan Arab Amirliklari hukumati COVID-19ga qarshi kurash uchun O‘zbekistonga insonparvarlik yordamining ikkinchi qismini jo‘natdi. Bu haqda O‘zbekiston musulmonlar idorasi WAM nashri ma’lumotiga asoslangan holda xabar qilmoqda.
Qayd etilishicha, 6-may kuni Toshkentga Etihad Airways aviakompaniyasi samolyoti bortiga ortilgan besh tonnalik oziq-ovqat va tibbiyot vositalari bilan kelgan.
Avvalroq BAA O‘zbekistonga 8 tonnalik insonparvarlik yordam jo‘natgan edi. Tibbiy niqoblar, qo‘lqoplar, himoya kostumlari va boshqa vositalar bo‘lgan maxsus reys Toshkent aeroportida kutib olingan edi.
