TOSHKENT, 25 apr - Sputnik. Oʻzbekiston jurnalistikasi veteranlariga 150 million soʻm ajratildi. Bu haqda Milliy mass-mediani qoʻllab-quvvatlash va rivojlantirish jamoat fondi Vasiylik kengashi raisi Komil Allamjonov oʻzining Feysbukdagi sahifasida xabar berdi.
""Xavfsiz Yordam" loyihasini davom ettirgan holda jurnalistika va telekommunikatsiya sohasining 100 nafar vakillari roʻyxatini shakllantirdik. Mazkur roʻyxatning asosini jurnalistika sohasida uzoq yillar faoliyat yuritgan faxriylar tashkil qildi, shuningdek salomatligini tiklash uchun davolanayotgan hamda turli oilaviy sabablarga koʻra ijtimoiy himoyaga muhtoj boʻlgan jurnalistlar ham kiritildi. Roʻyxatni shakllantirishda, tegishli tashkilotlar hamda ijtimoiy tarmoqlardagi jurnalistlar guruhlari yaqindan yordam berishdi", - deyiladi xabarda.
Taʼkidlanishicha, Fond tomonidan roʻyxatdagilarga ikki bosqichda jami 150 million soʻmlik moddiy yordam koʻrsatiladi. Xususan, birinchi bosqichda ularning uylariga oziq-ovqat mahsulotlari toʻplami yetkazilish boshlangan boʻlsa, keyingi bosqichda ularning har biriga maxsus plastik kartochkalarda 1 mln soʻmdan pul mablagʻlari taqdim etiladi.
