TOShKENT, 29 mar — Sputnik. Xitoylik milliarder, Alibaba Group asoschisi Jek Ma va uning xayriya fondi 7 ta mamlakatga koronavirus pandemiyasiga qarshi kurashishda yordam beradi. Bu haqda Reuter agentligi xabar qildi.
Ro‘yxatga quyidagi mamlakatlar kiritilgan: O‘zbekiston, Qozog‘iston, Qirg‘iziston, Ozarbayjon, Hindiston, Vyetnam va Butan.
Ushbu mamlakatlarga jami 1,7 million dona niqob, 165 ming dona COVID-19ni aniqlovchi test, himoya kiyimlari va zaruriy tibbiy asbob-uskunalar yuboriladi.
Fond bunga qadar Xitoy, Rossiya, Janubiy-Sharqiy Osiyo, YeI va Afrika mamlakatlariga koronavirusga qarshi kurashishda yordam qo‘lini cho‘zgan edi.
Eslatib o‘tamiz, avvalroq Birlashgan Arab Amirliklari hukumati O‘zbekistonga 8 tonnalik insonparvarlik yordamini jo‘natgani xabar qilingan edi.
