TOSHKENT, 15 mar — Sputnik. 9-11 mart kunlari Buxoro viloyatidagi tungi klub, kafe bar, restoran, chilimxona va boshqa koʻngilochar joylarda tungi reydlar oʻtkazildi. Bu haqda viloyat IIB axborot xizmati xabar qildi.
Reydlar Buxoro va Kogon shaharlari, shuningdek, viloyatning barcha tumanlari hududida Buxoro viloyati IIB, Milliy gvardiya, Mahalla, Yoshlar ittifoqi va boshqa jamoat tashkilotlari bilan hamkorlikda oʻtkazilgan.
Taʼkidlanishicha, tadbirdan koʻzlangan asosiy maqsad tungi vaqtlarda sodir etiladigan ogʻir va oʻta ogʻir jinoyatlarning oldini olish, ayniqsa tan jarohati yetkazish bilan bogʻliq jinoyatlarga yoʻl qoʻymaslikdan iborat boʻlgan.
Olib borilgan tezkor-profilaktik tadbirlar davomida jami 330 nafar shaxslar ichki ishlar boʻlimlariga olib kelingan. Ularning 100 dan ortigʻini qiz bolalar tashkil qilgan.
Tungi koʻngilochar joylarda yurgan yosh oʻgʻil-qizlar bilan Yoshlar ittiqofi va psixolog xodimlar tomonidan yakka tartibda profilaktik suhbatlar oʻtkazilib, oilaviy yashash sharoitlari, nima sababdan bemahalda (tungi soatlarda) bunday joylarda yurganliklari oʻrganildi.
Tungi klub va boshqa koʻngilochar joylar egalari hamda masʼullariga voyaga yetmaganlarni majburiy mehnatga jalb etmaslik, tungi vaqtlarda voyaga yetmaganlarning ota-onasi yoki ularning oʻrnini bosuvchi shaxslarsiz boʻlishlariga yoʻl qoʻymaslik toʻgʻrisida tushuntirilib, ogohlantirish ishlari olib borildi.
Oʻtkazilgan tadbirlar davomida Maʼmuriy javobgarlik toʻgʻrisidagi kodeksning 188-2-moddasida koʻrsatilgan 4 ta (voyaga yetmagan shaxsning koʻngil ochish (dam olish) joylarida tungi vaqtda boʻlishiga yoʻl qoʻyish) huquqbuzarlik hamda 5 ta fohishalik bilan shugʻullanish holatlari aniqlandi.
