TOSHKENT, 11 mar - Sputnik. Oʻzbekistonliklar UzAuto Motors kompaniyasining avtomobil narxilarini oshirganiga qarshi fleshmob uyushtirishdi.
Yangi #GM_Uzbekistondan_moshina_olmayman xeshtegi ijtimoiy tarmoqlarda tobora ommalashmoqda. Odamlar shu tariqa oʻz noroziliklarini namoyish etishmoqda.
Koʻpchilik UzAuto Motors (avvalgi General Motors Uzbekistan) kompaniyasi umuman yopilib ketsa, qarshi emasligini yozmoqda.
“Odamlar mashina olish uchun yillab pul yigʻadi. Lekin har doim uning narxi oshirilishi tufayli uni sotib ololmaydi. Ushbu ijtimoiy norozilik bilan biz bunday narx oshirilishiga qarshi ekanimizni isbotlamoqchimiz”, - deya yozadi kuyunib oddiy fuqarolardan biri.
Eslatib oʻtamiz, kuni kecha UzAuto Motors kompaniyasi 9 martdan avtomobillar uchun yangi narxlarni eʼlon qilgan edi. Unga koʻra, avtomobillar narxi turiga qarab 3 foizdan 21 foizgacha oshgan.
