TOShKENT, 7 mar — Sputnik. O‘zbekiston tez orada Yevroosiyo iqtisodiy ittifoqiga (YeOII) kuzatuvchi sifatida kirish taklifini ilgari surishni rejalashtirmoqda. Bu haqda RIA Novosti mamlakat Vazirlar mahkamasi matbuot xizmatiga tayangan holda xabar qilmoqda.
Hukumatning ishchi guruh tomonidan juma kuni qabul qilingan qaror tez orada Oliy Majlis palatalariga ko‘rib chiqish uchun kiritiladi.
“Hukumat yaqin kunlarda parlamentning har ikki palatasiga O‘zbekistonning YeOIIda kuzatuvchi-davlat sifatida ishtirok etishi haqidagi taklifni kiritadi”, - dedi hukumat vakili.
Ta’kidlanishicha, o‘tkazilgan tahlil natijalariga ko‘ra bugungi kunda kuzatuvchi maqomi O‘zbekiston uchun eng ma’quli degan xulosaga kelingan.
Yig‘ilishda yetakchi mustaqil konsalting kompaniyalari va ilmiy-tadqiqot muassasalarining izlanishlari, xorijiy va mahalliy mutaxassislar tomonidan bildirilgan taklif va xulosalar ko‘rib chiqilgan.
Shuningdek, O‘zbekistonning YeOII bilan hamkorligi doirasidagi iqtisodiyotning yirik tarmoqlari, jumladan, sanoat, tashqi savdo siyosati, bojxona-tariflarini tartibga solish mexanizmi, mehnat migratsiyasi, standartlashtirish va veterinariya, sanitariya, fitosanitariya nazorati kabi ko‘plab masalalar bo‘yicha ekspertlarning xulosalari o‘rganib chiqilgan.
YeOII – 2015-yildan buyon amal qilib kelayotgan integratsion iqtisodiy birlashma. Unga Rossiya, Armaniston, Belarus, Qozog‘iston va Qirg‘iziston a’zodir.
