TOSHKENT, 5 mar — Sputnik. Markaziy bank boshqaruvining 2020 yil 5 martdagi qarori bilan asosiy stavka yillik 16 foiz darajasida oʻzgarishsiz qoldirildi. Bu haqda bank matbuot xizmati xabar qildi.
“Ushbu qaror tartibga solinadigan narxlarning kutilayotgan erkinlashtirilishi hamda koronavirus bilan bogʻliq boʻlgan tashqi iqtisodiy noaniqliklarning kuchayishi bilan izohlanadi”, - deyilgan xabarda.
Markaziy bank hisob-kitoblariga koʻra, inflyatsiyaning eng yuqori darajasi joriy yilning ikkinchi choragida kuzatilishi mumkin. Ayni vaqtda 2020 yilning ikkinchi yarmida tariflar oʻsishining inflyatsiyaga taʼsiri pasayib boradi va yil oxirida inflyatsiya darajasi prognoz koridorining yuqori chegarasiga yaqinlashadi.
