TOSHKENT, 23 fev — Sputnik. Yaqinda Samarqandga tashrif buyurib, uning sayyohlik infratuzilamasidan qoniqmagan taniqli rossiyalik bloger urbanist Ilya Varlamov shahar aholisidan uzr soʻradi.
Varlamovning soʻzlariga koʻra, “Jivoy jurnal”da uning Samarqandga sayohati haqida maqola nashr etilishidan bir kun oʻtib, shaharda “ish qaynab ketgan”. Amaldorlar bloger kezgan joylarda boʻlib, u tanqid qilgan kamchiliklarni tuzatishgan.
Shaharning obodonlashtirish boshqarmasi rahbari Otabek Abdullayev Facebook᾽dagi sahifasida Varlamov maqolasida koʻrsatilgan obodonlashtirish ishlariga oid kamchiliklar bartaraf etilayotganini maʼlum qildi va oʻquvchilarga fotohisobotni taqdim etdi. Shuningdek, u shahar mutasaddilari kelgusida bunday kamchiliklarga yoʻl qoʻymaslikka harakat qilishlarini taʼkidladi.
“Bir tarafdan, bu juda ajoyib. Tanqidga yaxshi va toʻgʻri munosabat. Boshqa tarafdan, shahar boʻylab juda yuzaki sayr qilganimdan xijolatdaman. Agar oʻzbek amaldorlari kamchiliklarini shunchalik tezkor isloh qila olishlarini bilganimda, tomoshaga jiddiyroq yondoshgan boʻlardim. Umuman olganda, bu mendagi kamchilik. Uzr soʻrayman”, - deya yozgan Ilya Varlamov.
Shuningdek, u Oʻzbekistonga albatta yana qaytishiga ishontirgan. U Toshkentni koʻrish ishtiyoqida.
