TOShKENT, 18 fev — Sputnik. Andijon viloyatida yosh yigitning shafqatsiz kaltaklanishi yolg‘on xabar bo‘lib chiqdi. Bu haqda IIV huzuridagi Tergov departamenti xabar qildi.
Gap ijtimoiy tarmoqlarda tarqalgan bir yosh yigitning bir necha kishi tomonidan kaltaklanishi haqida bormoqda.
Ushbu videoni huquqni muhofa qiluvchi organ xodimlari o‘rganishgan. O‘smirlarni topib qo‘lga olishgan. Tergovda video sahnalashtirilgani oydinlashgan.
“2020 yil 3-yanvar kuni Shahrixon tumanida yashovchi O.S., K.K. va I.N.lar yashash xonadonni ta’mirlashayotgan vaqtlarida O.S.ning kiyimlariga qurilishda foydalanib kelayotgan “qizil” rang beruvchi (koller) to‘kilib ketganligi sababli O.S.ning taklifiga ko‘ra sun’iy ravishda kaltaklanayotgan shaxsning holatini vujudga keltirib, videotasvirga olib, telegramm ijtimoiy tarmog‘i orqali internetda tarqatib yuborishgan”, - deyilgan xabarda.
Tergov departamenti xodimlari ularning qilmishlarini keng jamoatchilik ishtiroki va ota-onalari bilan birgalikda tanqidiy muhokama qilishdi.
