TOShKENT, 13 fev — Sputnik. Sirdaryo viloyatining Boyovut tumanida qimorxona tashkil etgan fuqarolarning
faoliyatiga chek qo‘yildi.
Bosh prokuratura matbuot xizmati xabariga ko‘ra, tezkor tadbirda fuqaro M.M. va boshqalar Boyovut tumanidagi eski traktor parki binosida qonunga xilof ravishda qimor va tavakkalchilikka asoslangan xo‘roz urishtirish o‘yinini tashkil etishgani aniqlangan.
Ular o‘yinga fuqarolarni jalb qilgan holda o‘yinga kirish uchun har bir kishidan ma’lum miqdorda pul yig‘ib olishgan.
Shuningdek, fuqaro “Milliy o‘yinlar tashkillashtirish” deb ko‘rsatilgan guvohnomani soxtalashtirgan.
Mazkur holat yuzasidan fuqaro M.M. va boshqalarga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.