TOShKENT, 28 yanv — Sputnik. O‘zbekiston va Tojikiston hamkorlikda Zarafshon darosida GES bunyod etishni muhokama qildi.
“O‘zbekgidroenergo” AJ axborot xizmatining xabar berishicha, ushbu masala ikki davlat ishchi guruhining uchrashuvida muhokama qilingan.
“Muhokama mavzusining asosiy masalasi – Tojikiston Respublikasi hududidagi Zarafshon darosida Yavan GESini qurish loyihasi bo‘ldi. Loyihaning dastlabki qiymati taxminiy miqdori 282 mln. AQSh dollarini tashkil qiladi”, - deyiladi xabarda.
Ta’kidlanishicha, Yavan GESning yillik elektr energiyasini ishlab chiqarishi 140 MVtga teng bo‘ladi.
Tojikiston delegatsiyasi bilan yakuniy-xulosaviy uchrashuv 29-yanvar kuni o‘tkaziladi. Unda ikki tomonlama hamkorlikning kelgusi rejalariga doir masalalar yakuniy tarzda ko‘rib chiqiladi.
