TOShKENT, 12 dek – Sputnik. Bugun, 12-dekabr kuni Andijon viloyatida "Paytug‘" temir yo‘l stansiyasida ikki dona bo‘sh vagon temir yo‘l izidan chiqib ketdi.
Sodir bo‘lgan holat yuzasidan IIV axborot xizmati xabar berdi.
Qayd etilishicha, 2019-yil 12-dekabr kuni soat 07:30 larda Qozog‘iston Respublikasidan 13 ta yarim ochiq vagonlarda MChJlardan birining nomiga ko‘mir mahsulotlari keltirib tushirilgan.
Hodisa ko‘mir tushirib bo‘lingach, vagonlar g‘ildiraklari ostiga temir yo‘l bashmaklarining mahkamlanmaganligi sababli yuzaga kelgan.
Natijada bo‘sh vagonlar pastga harakatlanib borib, 63080675-sonli yarim ochiq bo‘sh vagon temir yo‘lning chap tomonidagi ariqqa tushib ketgan. 60745015-sonli vagonning old g‘ildiraklari esa temir yo‘l izidan chiqib ketgan.
Xabarda aytilishicha, hodisa natijasida tan jarohati olganlar yo‘q. Ayni damda holat yuzasidan qo‘shimcha surishtiruv ishlari olib borilmoqda.
