TOShKENT, 10 dek - Sputnik. Toshkentning Yunusobod tumanidagi ba’zi ko‘chalar avtotransport harakati uchun yopildi.
Endilikda, ayrim yo‘nalishlardagi avtobuslar o‘z yo‘nalish harakatini A.Donish ko‘chasidan Yangi shahar hamda A.Temur ko‘chalari bo‘ylab davom ettiradi. Bu haqda "Toshshahartransxizmat" axborot xizmati xabar qildi.
Qayd etilishicha, Toshkent metropoliteni Yunusobod yo‘nalishining ikkinchi bosqich qurilishlari doirasida yerosti o‘tish yo‘lini barpo etish ishlari olib borilmoqda. Shu munosabat bilan ta’mirlash ishlari yakuniga qadar hududdagi A.Donish ko‘chasining Yangi shahar ko‘chasidan boshlab Amir Temur ko‘chasigacha bo‘lgan qismidagi o‘tish yo‘li avtotransportlar harakati uchun yopiladi.
Bu esa jamoat transporti - avtobuslar harakatiga ham tegishli bo‘lib, yuqoridagi manzil bo‘yicha harakatlanuvchi 5, 25, 36, 52, 60, 72, 82, 91, 95, 96, 97, 111, 119, 140, 149, 151, 152, 190, 198-sonli yo‘nalishlardagi avtobuslar o‘z yo‘nalish harakatini A.Donish ko‘chasidan Yangi shahar hamda A.Temur ko‘chalari orqali davom ettiradi.
