TOShKENT, 4 dek — Sputnik. Dushanbe shahri raisi Rustam Emomali boshchiligidagi delegatsiya a’zolari Tashkent city`da bo‘ldi. Bu haqda Toshkent shahar hokimligi matbuot xizmati xabar qildi.
Qayd etilishicha, mehmonlar umumiy maydoni 43 ming kvadrat metr bo‘lgan Kongress-xoll, uning 4500 kishiga mo‘ljallangan anjumanlar zali, ikki taraflama uchrashuvlar uchun xonalari, restoran, kichik konsert zali va dam olish xonalarini ko‘zdan kechirganlar.
Shuningdek, Tashkent City`dagi “Toshkent planetariysi” va “Madam Tusso” muzeyidagi muhit va sharoitlar bilan tanishdilar.
Xabarda delegatsiya a’zolari Tashkent city`ning kechki, yog‘dular og‘ushidagi go‘zal manzarasi va musiqali favvoraning yoqimli ko‘rinishidan ham bahramand bo‘lgani aytilgan.
Eslatib o‘tamiz, avvalroq Emomali Rahmonning to‘ng‘ich o‘g‘li, Dushanbe shahri raisi Rustam Emomali Toshkentga kelgani va Toshkent shahar hokimi hamda prezident Shavkat Mirziyoyev bilan uchrashgani xabar qilingan edi.
