TOShKENT, 24 okt — Sputnik. Qirg‘iziston Oliy sudi Konstitutsiyaviy palata sudyalari sobiq prezident Almazbek Atambayev tarafdorlarining talabini rad etdi. Bu haqda Sputnik Qirg‘iziston xabar qilmoqda.
Tegishli qaror bugun qabul qilingan. Sobiq prezident tarafdorlari Almazbek Atambayevni daxlsizlik huquqidan mahrum qilishga imkon bergan qonunchilikka kiritilgan o‘zgartirishlarni zid deb topishni talab qilishgan edi.
Biroq sud kiritilgan o‘zgartirishlar Konstitutsiya meyorlariga muvofiq kelishi to‘g‘risida qaror qabul qilgan. Sobiq prezidentning advokati Nurbek Toktakunov sud qarori ustidan shikoyat keltirmasliklarini ma’lum qilgan.
Eslatib o‘tamiz, Qirg‘iziston parlamenti 13-iyun kuni maxsus komissiyani tashkil etgan va u olib borgan ish natijasida Almazbek Atambayev oltita jinoyatga aloqador bo‘lishi mumkinligi haqida xulosa qilingan. Juqorg‘u Keneshi 20-iyunda xulosani tasdiqlab, bosh prokuraturaga yubordi. 25-iyun kuni bosh prokuror 6 faktdan 5 tasi bo‘yicha jinoyat ishlari qo‘zg‘atish uchun asos borligini ma’lum qildi. Qirg‘iziston parlamenti deputatlari 27-iyun kuni Almazbek Atambayevni sobiq prezident maqomini olib tashlashga ovoz berishdi va u to‘g‘ridan-to‘g‘ri daxlsizlik huquqidan mahrum bo‘ldi.
Qo‘y-Toshdagi voqealar
7 avgust kuni kechqurun Qo‘y-Tosh qishlog‘ida GKNB spesnazi Atambayevni qo‘lga olish bo‘yicha operatsiyani amalga oshirishga urindi, ammo shturm uning tarafdorlari tomonidan yo‘qqa chiqarildi. 8-avgust kuni huquq tartibot organlari takroriy shturmni amalga oshirdilar, oqibatda siyosatchi taslim bo‘ldi. Hozirda Atambayevga bir nechta ayblov qo‘yilgan. Sobiq prezident advokati so‘zlariga ko‘ra, Atambayev tergov boshlangan kundan boshlab birorta savolga javob bermagan, sababi o‘ziga qarshi amalga oshirilayotgan harakatlar noqonuniy deb hisoblaydi.
