TOShKENT, 22 okt - Sputnik. Sovet Ittifoqi va G‘arb davlatlari o‘rtasidagi sovuq urushning tugashi umumiy g‘alaba edi. Bu haqda SSSR sobiq prezidenti Mixail Gorbachov Germaniyaning “Welt am Sonntag” gazetasiga bergan intervyusida ma’lum qildi.
“Lekin G‘arb siyosatchilari, birinchi navbatda AQSh, o‘zlarini g‘olib deb e’lon qildi. Bu haqda hamma joyda jar solishdi. Aytgancha, ommaviy axborot vositalari ham ularning nog‘orasida o‘ynadi”, - deya Gorbachov so‘zlaridan keltiradi RIA Novosti.
Siyosatchining so‘zlariga qaraganda, G‘arb davlatlari yetakchilari urush yakunlanganini bunday talqin qilinishi Rossiyada qanday qabul qilinishi va kelgusi munosabatlarga qanday ta’sir ko‘rsatishini hisobga olishmagan. Shu bilan birga, G‘arb o‘zini “hammasi mumkin” qabilida ish tuta boshladi, deya qo‘shimcha qildi SSSR sobiq prezidenti.
Gorbachovning ta’kidlashicha, Rossiya hamkorlari “yangi davr sinovlariga dosh berolmagan” va bu ular va Moskva o‘rtasidagi hozirgi kelishmovchiliklarning asosiy sababidir.
“So‘nggi paytlarda Yevropada ba’zi siyosatchilar Rossiya izolyatsiyasiga urinishlar barcha uchun zararli ekani va birgalikda barcha tomonlarga mos keladigan yechimni izlash zarurligi haqida chuqurroq o‘ylay boshladilar. Men bilaman, Rossiyada ham shu haqda o‘ylashmoqda”, - deya xotima qilgan u.
1946 yildan 1980-yil oxiriga qadar bo‘lgan davrda SSSR va AQSh rahbarlik qilgan ikki davlat blokining harbiy, iqtisodiy va mafkuraviy qarama-qarshiligiga sovuq urush deb ataladi. 1989-yil dekabr oyida Gorbachov va Amerika prezidenti katta Jorj Bush sovuq urushning yakunlanganini rasman e’lon qilishdi. Qarama-qarshilikning yakunlangani 1990-yilda qabul qilingan “Yangi Yevropa uchun Parij xartiyasi” hujjati bilan tasdiqlangan.
